Karnaper sa minglanilla nadakpan na gyud

CEBU, Philippines - Duha ka suspetsadong carnapper  nga giingong responsable sa pagpangarnap og tulo ka motorsiklo sa milabay’ng bulan ang nasikop sa kapolisan sa lungsod sa Minglanilla niadtong milabay’ng Biyernes ug Sabado diha sa barangay Ward II, Poblacion sa maong lungsod.

Giila ang mga suspetsado mao sila si Bryan Agbanlog, 24, taga sitio Mananga, barangay Tabunok, dakbayan sa Talisay ug Alvin Pardillo, 20, taga lungsod sa Minglanilla.

Gipangita pa usab ang manghod ni Agbanlog nga si Nelson,  20, kinsa giingong maoy look-out sa duha atol sa ilang pagpangarnap.

Si Chief Inspector Timmar Jomio Alam, hepe sa kapolisan sa Minglanilla nagkanayon nga ang pagkasikop sa duha inabagan kini sa kooperasyon sa mga opisyal sa barangay Tunghaan ug Ward II.

Si Alam nga nahinabi sa mga tigbalita kagahapon mibutyag nga ang magsuong Agbanlog mga lumad nga taga Cavite. Ang maguwang nga Agbanlog napasakaan na og kasong carnapping diha sa piskaliya sa lungsod niadtong tuig 2012. Ang maong kaso na-dismissed kini tungod kay giareglo sa pamilya sa suspetsado ang biktima.

Apan niadtong adlaw nga Huwebes gireklamo si Bryan sa usa ka tag-iya og kan-anan tungod sa gibayad niining peke nga P1,000. Si Dionesio Tinebro nga mao untay buot ilaron ni Bryan wala na mopadayon sa iyang reklamo. Gibutyag ni Alam nga usa sa iyang mga polis ang nakamay-ong kang Agbanlog ug natahap usab sila nga duna kini kalambigitan sa sunod-sunod nga tulo ka insidente sa pagpanagit og mga motorsiklo niadtong buwan sa Hulyo niining tuiga.

Ang kapolisan misukit-sukit kang Agbanlog ug ang suspetsadong giingong miangkon  nga duna siya’y kasong carnapping niadtong buwan sa Mayo 2012 nga na-dismiss.

Tungod sa maong pag-angkon ni Agbanlog, gipatawag ni Alam ang mga gikawatan og motorsiklo sa milabay’ng bulan.

Si Geef Aldrin Secuya, taga barangay Ward II miila dayon kang Agbanlog nga maoy midagit sa Suzuki Raider-J nga motorsiklo nga nagtangag sa plakang GP-6869 nga gipanag-iya ni Dioscoro Villeta niadtong Hulyo 16, 2013 diha atubangan sa Evangelical School sa barangay Ward II.

Gibutyag usab ni Alam nga sa iyang padayong sukit-sukit sa suspetsado giingong miangkon kini sa maong pasangil batok kaniya ug mao pay mitudlo kung asa niya gipamaligya ang mga motorsiklong ilang gipangdagit.

Duha ka motorsiklo ang na-recover sa mga polis gikan sa usa ka shop diha sa sitio Kimba, barangay San Roque, dakbayan sa Talisay. Ang maong mga motorsiklo gipisa-pisa na.

Niadtong Lunes sa buntag ang tag-iya sa shop miuli ngadto sa kapolisan sa Minglanilla sa duha ka mga motorsiklo nga assembled na pag-usab. Usa sa maong mga motorsiklo ang wonder bike nga gipanag-iya ni Zanro Magbanua nga taga lungsod usab sa Minglanilla gi-carnap niadtong Hulyo 26, 2013.

Si Agbanlog giingong mibutyag kini nga ang iyang manghud nga si Nelson ug si Pardillo kauban niya kini sa pagpanagit og motorsiklo.

Si Pardillo ang giingong maoy tigpaandar sa motor samtang ang iyang manghod nga si Nelson maoy ilang look-out.

Niadtong Biyernes sa gabii nagpahigayon og follow-up operation ang kapolisan nga miresulta sa pagkasikop ni Pardillo apan si Nelson ang nakaikyas. Si Agbanlog kagahapon nga nahinabi sa mga tigbalita nagkanayon kini nga gikan siya sa Cavite apan duna siya’y igsuon diha sa sitio Mananga hinungdan nga mianhi siya sa Sugbo niadtong tuig 2011 aron mobakasyon.

Gibutyag usab ni Agbanlog nga barkada sila ni Pardillo ug nag-abang sila og balay diha sa Ward II. Apan si Pardillo sa iyang bahin, nihimakak sa mga pasangil batok kaniya. (BANAT NEWS)