Sa Ironman Triathlon karon mga motorista angayan mosunod sa traffic signs

CEBU, Philippines - Walo ka oras siradohan ang kadalanan sa Metro Cebu gikan sa dakbayan sa Lapulapu karong adlawa alang sa 70.3 Ironman Triathlon nga manukad gikan sa Brgy. Punta Engaño ngadto na sa Mandaue, Cebu City ug dakbayan sa Talisay.

Matud pa ni Frank Brazil ang hepe sa Lapulapu City Traffic Management System o CTMS sugdan ang pagtak-op sa kadalanan nga agian sa Ironman Triathlon alas 4:30 karong kaadlawon ug ablihan kini alas 12:00 pa sa udto human makaagi ang mga bikers gikan sa dakbayan sa Talisay.

Gumikan niini giawhag ni Brazil ang mga motorista nga padung sa dakbayan sa Lapulapu nga magsayo ilabi na ang mga pasahero sa Mactan Cebu International Airport o MCIA ug mga trabahante sa Mactan Economic Zone o MEZ.

Ang mga motorista nga gikan sa 1st Mactan Bridge padung ngadto sa MCIA giawhag nga diretso lang ug pag-abot sa unang crossing Left Turn (LT) moagi sa Sitio Sangi (kanto sa petron station) LT padung sa likod sa Lapulapu City Hall, right turn (RT) sa Sitio Mustang Seaweeds Pusok, diretso sa Sitio Matumbo ug gawas ngadto sa airport road.

Ang mga pribadong sakyanan pwede usab nga moagi sa Mactan Benito Ebuen Air Base ngadto na sa MCIA.

Samtang gikan sa Brgy. Punta Engaño left turn sa Brgy. Mactan ngadto na sa Brgy. Maribago, Brgy. Agus right turn sa Brgy. Marigondon, Brgy. Basak ngadto na sa unang taytayan ug dakbayan sa Mandaue.

Hinoon matud pa ni Brazil nahibalo na ang mga kompaniya sa MEZ ug sa MCIA sa maong kalihukan ug sa rerouting scheme nga ilang gipatuman.

Tambag ni Brazil ngadto sa katawhan ug motorista nga dili moanhi og sayo sa dakbayan sa Lapulapu kung walay importanteng tuyo aron dili kini makahatag og dugang problema sa trapiko.

Samtang mopatuman usab og re-routing scheme sa mga sakyanan ang dakbayan sa Mandaue.

Si Edwin Ermac nga maoy pangulo sa Traffic Enforcement Agency of Mandauae (TEAM) miingon nga ang mga dalan gikan sa Marcelo Fernan Bridge nga mosubay sa dalan Plaridel lahos na ngadto sa Ouano Avenue sa dakbayan sa Sugbo hingpit usab nga pagatak-opan alang sa mga motorista.

Dugang pa niya nga adunay dakong kausaban sa trapiko sa dakbayan sa Mandaue ilabi na ang mosulod sa merkado publiko, apan mahimo gihapong makalusot agi sa mga alternatibong mga dalan.

Sa dakbayan sa Sugbo mihimo usab sa ilang traffic advisory sa mga dalan sa reclamation area sa dakbayan sa Mandaue lahos na ngadto sa S. Omeña Avenue ug paingon sa South Road Property.

Gipahimangnoan ang mga motorista sa pagsunod lang sa ipamutang unya nga mga traffic signs diha sa kadalanan aron di masaag sa rota sa triathlon. EIM (BANAT NEWS)