Opisyal sa Comelec nangayo’g pasaylo

CEBU, Philippines - Nangayo og pasaylo ang Commission on Election (Comelec) sa kahasol sa  wala  marehistro tungod sa kadaghang  tawo sa nagkalain- laing buhatan sa Comelec dinhi sa Sugbo  pag-abot  sa deadline  niadtong  Miyerkules  sa  hapon, Hulyo 31, 2013

Si Atty. Ferdinand Gujuilde, Election officer sa Provincial Comelec Office  mibutyag  sa Bantay Radyo   nga  daghan  kaayo  ang mga bag-ong botante nga buot moparehistro ,  ug ingon man kadtong mo-transfer ug magpa-activate sa ilang rehistro sa SK.

Usa sa gihimong basihanan  niya  mao ang Comelec North ug South district dinhi sa dakbayan sa Sugbo diin Martes sa gabii pa ang uban naglinya sa buhatan sa Comelec aron makauna og rehistro pagka Miyerkules sa buntag atol sa deadline.

Giangkon ni Gujuilde nga ang kagamay lang sa panahon nga gitugot sa special registration maoy usa sa  nakatampo sa  paghuot  sa mga magparehistro nga bag-ong botante.

Gipasabot   usab ni Gujuilde nga lisud na gyud mahitabo ang paghatag og extension sa registration tungod sa balaod nga nagdili na pagpahigayon og pagpang rehistro, 90 ka adlaw sa dili pa himoon ang eleksyon.

Apan gipasabot ni Gujuilde nga kun motugot ang Comelec en banc  nga lugwayan   ang  registration,  andam  silang mosunod  niini.

Samtang si Provincial Comelec Supervisor Atty. Lionel Marco Castiliano misusi sa tanang mga buhatan sa Comelec sa kalungsoran ug dakbayan  sa  pagsil-ing  sa  kahimtang sa katapusang adlaw sa registration.

Sagad sa mga buhatan sa Comelec   nga naghuot sa mga moparehistro mao kadtong  anaa  sa  dakbayan ug dagkung mga lungsod.

Human  mapupos   ang  registration sa Comelec, mangandam  na  sila alang  sa mga  panginahanglan  sa  SK ug barangay election   sa  Oktubre. WC (BANAT NEWS)