75 ka iro makabalda sa Ironman gidakop

CEBU, Philippines - Mokabat sa 75 ka mga irong libodsuroy nga maagian sa rota sa Ironman sa dakbayan sa Lapulapu gipangdakop ug gipakaon.

Matud pa ni Lapulapu City Tourism Officer Hembler Mendoza gisugdan sa City Pound sa dakbayan sa Lapulapu ang pagpanakop sa mga iro niadto pang Agosto 1 gikan sa Brgy. Punta Engaño hangtod sa 2nd Mactan bridge subay sa rota sa ipahigayong Ironman karong adlawa.

Ang pagpanakop sa mga iro gihimo alang sa kahapsay sa agianan sa mga partisipante nga dili madisgrasya atol sa pag-agi sa mga bikers padung ngadto sa dakbayan sa Talisay.

Ang mga iro giatiman pag-ayo sa siyudad diin gipakaon kini sa mga pagkaon gikan sa usa ka hotel samtang anaa kini sa ilang kustodiya.

Hinoon makuha ra pagbalik sa mga tag-iya kung ilaha kining lukaton ug bayran ang multa ug kadtong dili na interesado pang lukaton ang ilang binuhi sagupon na lang sa City Pound ang maong mga iro.

Sa milabay’ng Ironman niadtong 2012, usa sa problema nga nasugatan sa mga organizers mao ang mga iro nga anaa sa rota sa lumba  nga kuyaw kaayo sa mga partisipante. EIM (BANAT NEWS)