CEBU, Philippines - Nahunong makadiyot ang gipahigayon nga Ironkids kagahapon sayo sa buntag sa barangay Punta Engaño tungod sa kalit nga paghuros sa kusog nga unos nga nagdala og kusog kaayong pagbunok sa ulan.
Si Sr. Supt. Rey Lyndon Lawas nga maoy direktor sa kapolisan sa maong dakbayan miingon nga igo lamang gyod nga nahuman ang unang hugna sa Ironkids nga giapilan sa mga bata nga 6-anyos ngadto sa 10-anyos ang panuigon dihang mibundak ang uwan ug unos.
Ang ikaduhang hugna sa Ironkids giapilan usab sa mga bata nga nagpanuigon na og 11-anyos ngadto sa 14-anyos maoy nahunong sa makadiyot ug gipadayon na lamang dihang milurang na ang pag-ulan ug paghuros sa kusog nga hangin.
Si Lawas miingon nga mga 100 ka mga bata ang misalmot sa Ironkids nga naglumba sa pagbiseklita ug dagan sa palibot sa kadalanan sa barangay Punta Engaño.
Gisunod usab ang paglumba sa langoy apan gumikan sa kadautan sa panahon nadelatar ang paglangoy sa mga bata.
Si Jomar Clarino sa Pagasa Mactan nga nahinabi sa Banat News miingon nga ang maong pag-unos ug kalit nga pagbunok sa ulan dinala sa nasinati karong inter-tropical convergence zone nga nasinati sayo sa buntag kagahapon.
Dugang pa niya nga adunay pagpanugdog ug pagpangilat nga nahitabo sayo sa buntag nga nagdala usab og baga kaayong dag-om nga maoy nakaingon sa kusog nga pagbunok sa ulan.
Mipahimangno si Clarino nga ang kadautan sa panahon kagahapon sa buntag posibleng masinati usab karong adlawa atol na sa 70.3 Triathlon nga giapilan sa 2,500 ka mga lokal ug langyaw’ng atleta.
Adunay tropical depression nga nasigpatan ug gi-monitor sa Pagasa nga nahimutang 380 kilometro sa kadagatan Pasipiko sa habig sa Mindanao. EIM (BANAT NEWS)