Ambulansiya libre sa panahon sa emerhensiya

CEBU, Philippines - Libre na ang paggamit sa ambulansiya sa lungsod sa Daanbantayan alang sa mogamit niini panahon sa emerhensiya.

Ang konseho sa lungsod mipasar sa ordinansa nga gipangamahanan  ni Bise Mayor Gilbert Arrabis Jr. nga nagmando sa libreng gamit sa ambulansiya gikan sa lungsod paingon sa tambalanan sa dakbayan sa Bogo ug sa dakbayan sa Sugbo.

Gipasalamatan ni Arrabis ang tanan niyang kauban sa konseho nga  misuporta sa iyang gipalabang nga balaudnon.

Ang ordinansa gipirmahan na ni Mayor Augusto Corro ug ipatuman dayon sa labing daling panahon.

“Ang atong purpose ani, katong atong kaigsoonan nga kinahanglan og further treatment sa siyudad, kinahanglan madala sila sa syudad, dili rason nga way ikabayad,” matud pang Arrabis.

Ang gikinahanglan lang mao ang referral gikan sa nag-atiman nga doktor  sa  Rural Health Unit nga kinahanglan dad-on sa laing tambalanan ang pasyente, dugang  pa  ni  Arrabis. Ang lungsod adunay duha ka ambulansiya nga mahimong magamit 24 oras matag adlaw ug pito ka adlaw sa semana ug adunay drayber nga magpuli-puli.

Matud pa ni Arrabis nga kadtong mga dili residente sa Daanbantayan sama sa mga bisita ug turista nga makasugat og emerhensiya,  lakip usab  sila  nga  makagamit nga libre.

Sa miaging administrasyon, ang pasyente ang mobayad sa krudo ug bayad sa drayber una pa siya madala sa tambalanan.

Si Corro migamit una og P600 mil sa iyang intelligence fund isip pasiunang pundo.

Matud pa ni Arrabis nga P1 milyon ang ilang igahin sa sunod budget sa lungsod alang sa maong katuyoan. WC (BANAT NEWS)