Duha patay, tulo kritikal sa duha ka aksidente
CEBU, Philippines - Usa ang patay ug duha ang kritikal sa panagbangga sa duha ka mga motorsiklo sa barangay road sa Napo dakbayan sa Carcar sa miaging hapon.
Ang mga biktima pulos sakay sa ilang tagsa-tagsa ka motorsiklo sa dihang nahitabo ang maong aksidente.
Si Celgen Gascon, 27, molupyo sa Barangay Ubaña, patay nang naabot sa Carcar Provincial Hospital samtang sila si Rey Alcomendras, 18, mulopyo sa Barangay Mantatong ug ang angkas niini nga si Mark Anthony Flores, 18, mulopyo sa Barangay Mangyan, pulos taga-lungsod sa Sibonga gidala usab sa samang tambalanan ug gibalhin ang duha sa Vicente Sotto Memorial Medical Center.
Si Gascon matud pa nga sakay sa Honda Wave motorcycle niini nga adunay “for registration†paingon sa Barangay Ocaña dakbayan sa Carcar samtang si Alcomendras ug Flores sakay usab sa Rusi motorcycle nga adunay “for registration†gihapon paingon sa Barangay Mantatong.
Si SPO1 Silas Seballo, desk officer, mibutyag nga dili sila makaingon kung nakainom ba ang mga nagmaneho kay wala kini ma-liquor test.
Si Seballo midugang nga si Alcomendras mikawat sa pikas linya nga maoy hinungdan sa pagkaigo ni Gascon.
“Wala tingale makabantay ang usa (Gascon) nga nagpadulong ang pikas (Alcomendras) unya kusog ang dagan mao to pwerteng igoa,†matud ni Seballo sa pakighinabi sa telepono.
Sa kakusog sa impact giingong nangalabay ang sakay sa motorsiklo apan na-grabehan si Gascon nga maoy hinungdan sa pagkamatay niini.
Samtang patay usab ang usa ka lalaki ug naangol ang angkas niining babaye human mo-overtake sa gisundan nilang sakyanan apan nasangit niini diha sa National Highway sa barangay Basak, dakbayan sa Mandaue alas 10 pasado ang takna sa miaging gabii.
Ang namatay mao si Casimiro Galansa, taga sitio Pilapil, sa barangay Yati, lungsod sa Liloan ug ang grabeng naangol nga backrider niining babaye nga si Tunalyn Tarajo, taga barangay Dugoan sa dakbayan sa Danao.
Si PO2 Gerald Magbantay, imbestigador sa traffic division sa Mandaue City Police Office (MCPO) miingon nga kusog ang dagan ni Galansa subay sa dalan J.P. Rizal.
Matud pa nga nagsunod kini sa Kia Sportage nga gimaneho ni Arcenio Bedan Murcia, 53, ug giingong misuway og overtake si Galansa apan nasangit kini sa maong sakyanan ug misaliring.
Dead on arrival na sa Mandaue City District Hospital si Galansa samtang grabe usab ang angkas niining babaye nga wala magsuot og safety helmet. Si Murcia mitahan hinuon dayon sa kapolisan. (/EIM) (BANAT NEWS)
- Latest
