CEBU, Philippines - Ang Bangko Sentral ng Pilipinas (BSP) mipasidaan sa publiko batok sa mga mangingilad nga mopakatap og peke nga mga tseke ug kuwarta nga kunohay gikan sa BSP o sa kanhiay nga Central Bank of the Philippines.
Isip modus operandi sa mga mangingilad, magpakaaron-ingnon sila nga mga tinugyanan sa BSP nga mohangyo og kwarta bugti sa tseke nga mokantidad og minilyon ka pesos nga kunohay gikan sa BSP.
Kini giklaro sa BSP nga wala silay gipang-isyu nga mga cheke ug dili usab sila mogarantiya og cheke o dokumento sa mga tawo o grupo ba hinuon.
Isip financial regulator, ang BSP mopahigayon lamang og mga transaksyon sa mga financial institution nga ubos sa ilang pagdumala.
Kini nga pahibalo gikan sa Financial Consumer Affairs Group sa BSP aron magiyahan ang financial know-how sa mga konsumidor ug aron usab mapanalipdan ang publiko sa mga malimbongon nga mga tawo nga nagpalakat sa mao nga scam.
Alang sa dugang kasayoran mahitungod niini, mahimong maduol ang BSP Financial Consumer Affairs Group pinaagi sa ilang e-mail address nga consumeraffairs@bsp.gov.ph. (/WC) (BANAT NEWS)