CEBU, Philippines - Si Talisay City Budget Officer Edgar Mabunay gitakdang balhinon gikan sa iyang pwesto matud ni Konsehal Dennis Basillote.
Si Basillote kinsa walay lipud-lipod nga misulti niini mibutyag nga sa miaging administrasyon mihangyo siya nga hatagan ang matag konsehal og pundo alang sa ilang Legislative Development Assistance (LDA).
Gipasabot ni Basillote nga ang dakbayan sa Naga nakapanghatag og LDA ngadto sa mga konsehal sa siyudad lakip na gani ngadto sa mga kapitan ug kagawad sa kabarangayan ug posibleng mahimo usab kini sa Talisay.
Si Basillote mipasangil kang Mabunay nga maoy mibalibad nga hatagan ang mga konsehal sa ilang yango-ngo tungod kay ang paghatag og mga job order ngadto sa mga konsehal ila kini nga proyekto.
Midugang si Basillote nga adunay mga kalapasan nga nahimo si Mabunay apan wala niya ibutyag kung unsa ang maong mga kalapasan .
Ang bag-ong administrasyon sa Talisay misaad nga ang matag konsehal sa siyudad hatagan og tag -P1 milyon nga budget matag tuig. Miingon si Basillote nga daku ang iyang pagsalig nga matuman ang maong saad sa mayor ilabi na kung mabalhin si Mabunay.
Gawas sa maong saad sa mayor ang matag konsehal karon nga naa sa oposisyon gihatagan og 50 ka tawo isip quota nga pasudlon isip job order (JO), lahi sa milabay’ng administrasyon nga 20 ra. Si Basillote mitataw nga wala silay bangi ug si Mabunay apan iya lang gipadayag ang kamatuoran.
Si Mabunay sa iyang bahin nagkanayon nga wala siya’y problema kung asa siya ibutang.
Gipasabot niya nga wala siya mobalibad sa yango-ngo kaniadto apan gipapili niya ang mga konsehal kung budget ba ang gusto niini o paghatag og mga trabaho sa mga job order nga ilang quota.
Si Mabunay nagkanayon nga dili siya makapagawas og budget kun dili niya masuta nga kini mapanubagan sa siyudad. Apan karon posibleng magahinan na og budget ang matag konsehal tungod kay mitaas man usab ang madawat nga Internal Revenue Allotment (IRA) sa siyudad.
Sa milabay’ng tuig ang siyudad adunay P319 milyones nga IRA , samtang ang income mikabat usab sa P479.505 milyones.
Samtang gilauman nga mokabat sa P369 milyones ang IRA alang sa sunod tuig ug gilauman usab nga mokabat sa P520 milyones ang income sa Talisay. (/WC) (BANAT NEWS)