Illegal drugs, bad cops, human rights tutukan sa bag-ong hepe sa pro7

CEBU, Philippines - Problema sa illegal drugs, panangtangon ang mga badlungong polis sa rehiyon, ug kampanya kontra ilegal nga sugal maoy pokus sa bag-ong milingkod nga director sa Police Regional Office 7 nga si Chief Superintendent Danilo Constantino kinsa milingkod kagahapon.

Matud pa ni Constantino buot niyang tubagon pinaagi sa buhat ang panawagan ni Governor Hilario 'Junjun' Davide nga puohon ang illegal drugs sa Sugbu.

Buot usab niyang hatagan og pagtagad ang tawhanong katungod sa mga dinakpan ug ang paglutos sa mga badlungong polis.

Gisaad usab ni Constantino ang pagpahigayon sa Police Integrated Patrol System nga gisugdan ni kanhi PRO-7 Regional Director Marcelo Garbo Jr. ug  ang uban pa niyang mga maayong programa. Gihulagway ni Davide  si Constantino nga “qualified” ug nakita niyang makatabang ang bag-ong director sa pagpalambo sa Sugbo ug lukop Central Visayas.

Samtang karung adlawa usab ipahigayon ang turnover ceremony nilang Sr. Supt. Mariano Natuel Jr. diin iya kining ipasa ang katungdanan ngadto kang Sr. Supt. Noli Romana.(/EIM) (BANAT NEWS)