CEBU, Philippines - Bisan pa og misobra sa target collection ang nakolekta sa Bureau of Customs-Cebu sa buwan sa Hulyo dili pa kini garantiya aron dili ilabay sa laing adwana ang kasamtangang Cebu Customs District Collector Edward dela Cuesta.
Dili pa lang dugay gimando ni BOC Commissioner Ruzzano Rufino "Ruffy" Biazon ang lapad nga lahugay sa mga district collector human sila gilabhan og maayo ni Presidente Benigno Aquino sa State of the Nation Address niini kapin usa ka semana na ang milabay.
Si Dela Cuesta maoy unang district collector nga boluntaryong mi-relinquish sa iyang katungdanan human sa panawagan ni Biazon, apan nagpabilin gihapon sa BOC-Cebu hangtud wa pay bag-ong pwesto nga ihatag si Biazon.
Matud pa ni Biazon, duha pa ka mga district collector ang wala mosanong sa iyang kamanduan sa pagluwat sa ilang katungdanan nga napupos niadtong Hulyo 30 ning tuiga.
Sa bulan sa Hulyo, petsa 25 pa gani ang nakuha na sa BOC-Cebu P770 milyones nga mas taas pa sa target nilang P757,875,000 milyones. (/EIM) (BANAT NEWS)