JO sa Talisay laslasan

CEBU, Philippines - Pormal na nga gipahibawo ni Talisay City Mayor Johnny De los Reyes ang paglaslas  sa mga job order (JO) sa city hall sugod karong Agosto 1, 2013.

Ang maong pagpahibawo gipahigayon  human sa flag raising  ceremony niadtong Lunes sa buntag diin gikompirma sa mayor nga gikan sa kapin sa 2,000 ka  JO himuon na lang unya kining 1,200.

Ang nahisgutang mga JO nadestino  sa  nagkalain-laing buhatan sa city hall.

Matud sa mayor nga ang department of budget nagpahibawo nga kutob lang sa 1,200 ang gidaghanon sa JO ang gahinan og budget karong tuiga.

Hinuon gipasabot sa mayor nga dili angayang mabalaka ang mataktak nga mga JO tungod kay daghan nang mga establisamento sa Talisay ang misuporta sa iyang “adopt a Talisaynon program”.

Ang maong programa nag-awhag sa mga negosyante sa Talisay nga 40 ngadto sa 50 porsiyento sa ilang mga kawani gikan gyud sa siyudad.

Gipahibawo usab sa mayor nga adunay mga negosyante gikan sa laing siyudad ang mitanyag kaniya og tabang aron sa pagpatrabaho sa mga taga Talisay.

Ang Metroware Incorporated sa Mepza, Lapu-Lapu nga tiggama og sapatos giingong nagkinahanglan sila og 1,500 ka mga bag-ong empleyado .

Samtang  ang management sa Gaisano Fiesta Mall nakigkita usab kang De los Reyes ug misaad nga andam silang mo-prioritze sa mga Talisaynon.

Kahinumdoman nga ang hepe sa Human Resource Office sa Talisay nga si Hazel Bathan mibutyag  nga ang matag JO nga motrabaho gikan sa Lunes hangtud sa Biyernes magdawat  og suhol nga P300 matag adlaw.

Ang JO nga magtrabaho sulod sa unom ka adlaw sa usa ka semana magdawat  og  P253.84 matag adlaw ug kadtong JO nga motrabaho pito ka adlaw sa usa ka semana o walay day-off magdawat og suhol nga P220 matag adlaw.

Kasagaran sa mga JO nga walay day-off nadestino  sa pagpangolekta og mga basura. Ang confidential assistant magdawat  og P500 nga suhol matag adlaw.

Ang tanang JO  kinahanglan  nga motrabaho sulod sa 40 oras matag semana. (BANAT NEWS)