CEBU, Philippines - Patay ang usa ka construction worker human dunggaba sa iyang kauban sa trabaho sa Pier 8 sa barangay Subangdaku, dakbayan sa Mandaue sa miaging buntag.
Ang biktima mao si Fernando Lutao Ermac, 34 anyos, ulitawo nga lumad nga taga Agusan del Sur ug stay in worker sa construction site nga ilang gitrabahoan .
Ang suspetsado mao si Florencio Tombada, 44, minyo, nga lumad nga taga Eastern Samar ug stay-in worker gihapon sa ilang construction site .
Si PO1 Frederick Andales sa kapolisan sa Presinto 1 nga nahinabi sa Banat News miingon nga ang suspetsado mitahan sa ilang buhatan human sa maong hitabo ug temporaryo nilang gibalhog sa ilang detention cell.
Dugang pa niya nga nangutang og kuwarta ang suspetsado sa biktima ug dihang naningil kini gibalibaran sa suspek, hinungdan sa kasuko sa biktima ug dayon giligid niini og kulata ang suspek kinsa nahiagom sa mga bun-og sa lawas.
Nakahigayon ang suspek sa pagkuha og kutsilyo ug gidunggab ang biktima sa makadaghang higayon.
Gidala ang biktima ngadto sa Mandaue City Hospital apan namatay kini sa paglabay sa pipila ka oras samtang giatiman sa mga doktor sa maong tambalanan. WC (BANAT NEWS)