CEBU, Philippines - Si Konsehal Dave Tumulak mihulga nga pasakaan niya’g kaso ang mga opisyal sa kabarangayan nga dili mopatuman sa balaud may labot sa pangandam batok sa mga katalagman.
Si Tumulak nga kanhi sakop sa media sa wala pa mapili nga konsehal sa dakbayan sa Sugbo miingon nga ang mga opisyal sa kabarangayan angay’ng mopatuman sa balaud diha sa ilang mga dapit.
Matud ni Tumulak nga ang usa sa balaud nga angay’ng ipatuman sa mga opisyal sa kabarangayan mao ang pagpapahawa sa mga tawo nga nagpuyo sa 3-meter easement zone sa mga sapa kay sila anaa sa peligro. Si Tumulak miingon nga wala ibutang sa lagda sa Republic Act 10121 nga kinahanglan pa nga hatagan og hinabang-salapi o kaha dapit nga kabalhinan ang apektado nga mga pamilya.
Si Acting Cebu City Mayor Edgardo Labella misuporta sa lakang ni Tumulak apan gitataw niya nga dili siya maoy mangunay pagpasaka og kaso sa mga opisyal sa kabarangayan. Kun tinud-on sa mga sakop sa Reduce Danger Zones in River (ReDZ-R) ang pagpalayas sa mga pamilya nga anaa nagpuyo sa daplin sa kasapaan, gibana-bana nga mosobra sa 10,000 ka pamilya ang apektado. EIM (BANAT NEWS)