Pangandam sa kalamidad gihimo sa tunghaan sa Lapulapu

CEBU, Philippines - Nagkahiusa ang mga sakop sa Bureau of Fire Protection, Philippine Air Force, Commission on Higher Education, City Health Department sa dakbayan sa Lapulapu ug ang Philippine State College of Aeronautics o PhilsCA sa pagpahigayon sa Fire and Earthquake drill sa milabay’ng adlaw.

Matud pa ni Peth Fudolig ug Leonardo Tanael Jr. sa CHED nga ang maong kalihukan lakip sa CHED Memorandum No. 9 series 2013 nga sa matag tuig kinahanglang adunay susamang pagpangandam nga himuon.

Gumikan niini ang PhilsCA uban sa pamunuan ni Dr. Nonadel A. Soriano ang Campus Director ug Engr. Cercon Maiso ang hepe sa Security and Safety Department sa PhilsCA misanong sa maong kamanduan sa pamasin nga kung unsay kakulangan atol sa ilang pagresponde sa kalamidad mahatagan og igong kahibalo gikan sa mga ahensiya nga hanas sa pagsalbar sa         kinabuhi.

Atol sa maong drill gipakita sa mga tinun-an ang ilang angayang buhaton kung adunay linog ug sunog nga mahitabo diin hugot kining giobserbahan ni SFO1 Atilano Berido Jr. ug FO3 Ceasario Ceniza sa kabomberohan sa dakbayan sa Lapulapu.

Lakip sa miobserbar sa pagluwas sa usa ka biktima nga nadat-ugan atol sa linog mao si 2LT. Ma. Eufemia Tonelada sa PAF Base hospital.

Matod pa ni 2LT. Tonelada kakulangan lamang sa ekipo sa mga sakop sa rescue team ang iyang naobserbahan, apan sa kinatibuk-ang pag-atiman sa usa ka biktima sa kalamidad maayong pag-atiman sa bag-ong PhilsCA Nurse nga si Angelica Gorospe.

Samtang si Aldrin Ybañez ang representante sa Lapulapu City Health Department nalipay sa iyang nakitang panaghiusa sa mga tinun-an ug mga kawani sa maong tunghaan sa evacuation drill.

Gumikan niini si SFO1 Berido mihulagway ug mihatag og “Satisfactory” rating sa maong drill ug nanghinaut nga atol sa tinuoray nga panghitabo sa kalamidad mapalapdan pa sa maong tunghaan ang ilang evacuation center nga maoy importante alang sa kaluwasan sa tanang mga tinun-an.

Samtang si Dr. Soriano sa iyang bahin mapasalamaton sa maong obserbasyon sa mga ahensiya nga miobserbar sa maong drill ug misaad nga sa sunod nga tuig mahatagan og pagtagad ang mga kakulangan nga ilang nasinati atol sa maong drill. (BANAT NEWS)