CEBU, Philippines - Ang mga doktor didto sa MD Andersons Cancer Center sa Houston, Texas mitataw nga hingpit na g’yud nga nahanaw ang cancer nga kaniadtong 2008 mitakboy ni kanhi Mayor Tomas Osmeña.
Gitug-an kini ni Konsehal Margarita “Margot†Osmeña, ang asawa ni Tommy, atol sa dungan nga pagsaulog sa ilang adlaw’ng natawhan didto sa usa ka mall sa dakbayan sa Mandaue kagabii.
Ang magtiayong Osmeña bag-ohay pa lang nga miabot gikan sa Houston, Texas human nagpahiling pag-usab kun wala na ba mobalik ang cancer ni Tommy kaniadto.
Matud ni Margot nga gitug-anan sa iyang bana ang mga doktor nga usa sa rason nga napildi siya sa miaging eleksyon mao ang pagsiatab sa iyang kaatbang nga himatyon na siya ug usik lang kun ilang pilion si Osmeña.
Ang mga doktor nga nag-atiman ni Tomas mitataw nga wala nay cancer ang kanhi mayor ug dili tinuod nga hapit na kini mamatay basi sa gipasiatab sa mga propagandista sa kaatbang niini sa miaging eleksyon. (BANAT NEWS)