Illegal drugs gisusi nga motibo sa pagpamusil sa Duljo-Fatima
CEBU, Philippines - Usa ka-lalaki ang gipusil patay sa duha ka-lalaking angkas sa usa ka-motorsiklo diha sa may dalan R. Padilla St. corner B. Aranas Ext., Barangay Duljo-Fatima, dakbayan sa Sugbo kagahapon sa buntag.
Ang biktima giila nga si Christopher Sarmiento, 30, residente sa Quezon Boulevard, sa Bato, Barangay Ermita ning dakbayan.
Base sa imbestigasyon, si Sarmiento ang nagmaneho og itom nga street bike apan paghunong sa stop signal sa traffic lights duha ka lalaki nga angkas sa laing itom nga Honda Wave nga motorsiklo ang miduol kaniya ug gipusil kini makadaghang higayon.
Human matumba, gitiwasan katulo ka higayon sa ulo si Sarmiento, dali usab nga miikyas ang mga mamumuno nga nagsuot og brown jacket, camouflage shorts ug helmet nga puwa.
Unom ka kabhang ug usa ka deformed slug sa kalibre .45 na pistola samtang nakakuha usab sila og kalibre 9mm nga armas nga nakaluklok sa hawakan sa biktima nga dunay duha ka magazine ug mga ID niini.
Ang biktima patay dihadiha dayon tungod sa tulo ka samad pinusilan sa iyang ulo ug laing duha ka samad pinusilan sa iyang lawas.
Ang imbestigador sa Homicide Section nga si SPO4 Alex Dacua nagkanayon nga ilang gitan-aw ang anggulo sa drugas nga maoy posibleng hinungdan sa maong insidente. Posible dunay kontra sa biktima ang mga mamumuno maong nagdaladala kini og armas.
Ang kapuyo ni Sarmiento nga si Samantha Lim,19, mibutyag sa Banat News nga wala siya masayod nga dunay kontra ang biktima. Matud niya nga ang iyang nahibaw-an nag-review kini aron maka-take og board sa kriminology.(Niña G. Sumacot ug Sibyl A. Pacaña,USJR Intern/EIM) (BANAT NEWS)
- Latest
