CEBU, Philippines - Patay nang naabtan sa mga kabanay ang usa ka propesor sa University of Cebu human kini giingong nagpusil sa iyang kaugalingon pasado alas- 3 sa kaadlawon sulod sa iyang lawak sa ilang balay sa Sun Valley Subdivision, V. Rama Avenue sa barangay Calamba sa dakbayan sa Sugbu. Ang maong professor giila nga si Dr. Nelson Aldrich Esguerra, 36, molupyo sa maong dapit kinsa usa ka professor sa UC ug consultant sa usa ka bangko. Matud pa sa igsuon sa biktima nga si Garry Nelson nga pasado alas-3 sa kaadlawon dihang ilang nadunggan gikan sa lawak sa igsuon ang usa ka buto sa armas.
Tungod kay gikawatan na sila sa maong dapit, dako ang ilang pagtuo nga adunay kawatan nga nakasulod hinungdan nga nanuktok sila sa kwarto sa igsuon aron magpatabang.
Apan giingong wala mobangon si Nelson bisan giunsa nila og pukaw hinungdan nga giablihan nila ang kwarto gamit ang duplicate key ug didto ilang nakita ang nagbuy-od na ug nagkadugong igsuon.
Si SPO4 Rey Cuyos, imbestigador sa maong kaso miingon nga usa ka Smith and Wesson .9mm pistol nga adunay siyam ka buhing bala ug usa ka kabhang niini ang ilang nakuha diha sa lawak.
Nakuha usab nila ang unom ka pahina niyang suicide note nga diin gisaysay sa maong professor ang iyang kinabuhi ug nagpasalamat sa mga kabanay.
Diha sa suicide note usa ka ginganlan og “Marie†maoy iyang gikasuk-an og maayo. Labaw sa tanan, iyang gipadayag ang iyang walay katapusang paghigugma sa iyang fiancee ug nangayo usab siya niini ug pasaylo nga nagkutlo siya sa iyang kinabuhi.
Napaglantawan ni Cuyos nga usa sa hinungdan sa paghikog sa biktima mao ang mga personal niyang problema.
Ang pamilya sa biktima pinaagi sa igsuon niini mihulagway kaniya nga usa ka secretive nga tawo.
Samtang ang kauban sa biktima nga si Insp. Keith Allen Andaya sa shooting club nga International Defensive Shooting Association nasagmuyo usab sa maong panghitabo ug gani mipadayag kini nga karung adlawa aduna unta silay shooting competition.
Ang pamilya sa biktima wala na mihatag og dugang impormasyon kalabot sa nahitabo. (Lesley Caminade-Vestil/EIM) (BANAT NEWS)