CEBU, Philippines - Giklaro ni Department of Health (DOH) – 7 Director Dr. Asuncion Anden nga sakto ang gibuhat sa midwife sa Badian Birthing Center nga gipaadto ang magtiayon sa Badian District Hospital dihang nahibaw-an nga pito pa ka buwan ang pagmabdos niini.
Mao kini ang ilang Standard Operating Procedure kon SOP sa mga health workers kun premature ang masuso. Ang mga premature babies gikinahanglan og incubation. Ang mga birthing center wala niini. “We, to the best of the abilities motabang. But kon dili kaya, ngano pusgon man? Otherwise, mamatay na or mosamot and the health worker will be liable for it,†matud pa ni Anden.
Dili sab kinahanglang kuyogan og health worker ang pasyente kun mobalhin kini og laing hospital kay duna’y ubang mga pasyente nga naghulat na atimanon.
Samtang si Deputy Ombudsman for Visayas Pielago Apostol, miingon nga tan-awon nila kung tinuod ba gyud nga lisod ang kaso sa inahan nga nanganak.
“Titignan namin kung totoo nga na hindi nila kaya at paano nila sinabi iyon,†sulti ni Apostol, apan sa tan-aw ni Apostol nga pribado ang nahitabo ug dili angay iapil ang mga kawani sa gobiyerno. “Ang judgement call nasa discretion ng tao. Di nila na predict at napaghandaan na manganganak na siya,†puno ni Apostol.
Ang maong birthing center gidumala sa lungsod sa Badian. Timailhan kini nga duna’y mga kawani ug kwarta sa gobyerno nga nalambigit.
Apan kun wala’y mopasaka og reklamo ngadto sa Office of the Ombudsman ug sa DOH, pasagdan ni Apostol ug Anden ang lokal nga kagamhanan paghimo og imbestigayon.
Samtang gipangita karon ni Benjamin Javierto, 44, amahan sa masuso ang drayber sa traysikad nga maoy ilang gisakyan sa asawang si Regina dihang naahat kini og panganak ug natagak sa kalsada ang bata ug namatay.
Matud pang Benjamin buot nilang kuhaong testigo ang maong drayber alang sa pagpasaka unta nila og reklamo batok sa mga opisyal sa maong birthing center.
Ang pamilyang Javierto gipatawag na ni Badian Mayor Rubbort Librando ug gipasaligang dunay himuong imbestigasyon sa maong hitabo. (Annie Fe Perez/ UP Masscom intern ug report ni Darrel Carumba/EIM) (BANAT NEWS)