JVR mopagawas og kamandoan aron pabalikon ang vendors sa Tabunok

CEBU, Philippines - Si Talisay City Mayor Johnny De los Reyes gikatakdang moluwat og executive order (EO) sa pagpabalik sa mga vendors diha sa merkado sa Tabunok.

Si Vincie Monterde, Public Information Officer (PIO) sa siyudad nga nahinabi sa Banat News kagahapon mibutyag nga gawas sa EO maggama usab og memorandum of agreement (MOA) tali sa mga vendor ug sa mayor.

Gipasabot ni Monterde nga kinahanglang dunay MOA nga himuon aron walay kaguliyang nga mahitabo kung ugaling temporaryong pabalhinon na usab ang mga vendor kung gub-on na ang daang building sa merkado alang sa katukoran sa bag-ong building.

Apan bisan og wala pay pormal nga kasabutan tali sa siyudad ug mga vendor duna nay mga vendors og isda ug utanon ang namalik na sa pagpaninda diha sa merkado sa Tabunok.

Kahinumduman nga ang mga vendor nangasuko kini nila ni Bise Mayor Romeo Villarante, Konsehal Danny Caballero, Val Ylanan ug Aldin Diaz tungod sa pagpalabang sa resolusyon nga nagmando sa city engineering sa pagpaguba sa daang building sa merkado sa Tabunok.

Gani dunay grupo sa mga vendor ang misulong ngadto sa balay ni Caballero tungod sa mga nanggawas nga balitang di na sila pabalikon kun mahuman na ang bag-ong merkado.

Gihimakak kini sa mga opisyal sa dakbayan, sa pagkakaron wala pa gani silay kwartang magamit sa katukoran niini. (Brenda D. Batuto/EIM)

Mambaling Access

Road padung SRP

Usa ka rerouting ang ipatuman sa City Traffic Office Management ug Traffic Patrol Group sa Cebu City Police tungod sa medical mission sa Iglesia ni Cristo diha sa South Road Properties karong adlawa.

Apektado niini ang Access Road sa Mambaling padung sa South Coastal Road gikan sa C. Padilla St. sugod alas- 9 sa buntag hangtud sa alas- 10 sa gabii.

Gipahimangnoan ang tanang sakyanan nga motadlas sa C. Padilla St. ug N. Bacalso Avenue nga adto moagi sa lain pang access road padung   sa South Road Properties (SRP).

Ang ubang access road gawas sa Mambaling mahimong gamiton ang  underpass (tunnel), M.J. Cuenco Ave. (Malacañang), D. Jakosalem St. ug F. Jaca St., Laray Road, Inayawan aron makasulod sa SRP.

Ang mga sakyanan gikan sa South Coastal Road (SRP) mahimo usab molusot sa nahisgutang mga alternatibong dalan.

Gipahimangnoan ang mga motorista sa pagsunod sa mga ipamutang nga traffic signs sa mga apektadong mga dalan. (BANAT NEWS)