CEBU, Philippines - Duha ka buwan human madakpi ang usa ka pulis tungod sa kalapasan sa Comelec (Commission on Elections) gun ban ug illegal nga paghupot og armas, nasikop na usab kini human giingong namusil sa unom ka mga barangay tanod sa Barangay Mantalongon sa lungsod sa Barili adtong Martes sa gabii.
Si PO2 Anselmo Delos Santos, kinsa nadestino sa Cebu City Police Office (CCPO), giingong nakainom dihang kalit lang miabot sa waiting shed sa maong lugar sakay sa iyang motorsiklo nga adunay plaka nga 5794 HC.
Si Delos Santos mibunot sa iyang 9mm nga pistola dayong pusil sa makadaghang higayon ngadto nila ni Lyndon Anore, Jose Soroño, Roderick Soroño, ArnulfoTaburada, Nonito Ellado ug Julian Soroño.
Swerte hinuong walay naigo sa mga reklamante tungod kay dali silang nakapasalipod sa semento.
Wa na maabti sa mga mirespondeng polis si Delos Santos tungod kay nakaikyas na kini paingon sa dakbayan sa Sugbu.
Na-recover sa kapulisan ang pito ka mga basiyo sa bala sa pistola. Ang kapitan na sa maong barangay ang miturn-over sa pistol nga aduna pay usa ka bala.
Anaa na karon sa Philippine National Police Crime Laboratory sa Camp Sotero Cabahug, ang pistola alang sa ballistic examination.
Ang hepe sa kapulisan sa Barili Police Station, Chief Insp. Arvi Arbuis, mibutyag nga gisuwayan nila sa paggukod si Delos Santos hangtod sa pinuy-anan niini sa Sitio Kabangkalan, Pardo, dakbayan sa Sugbu apan pakyas sila sa pagsikop niini human miali ang asawa niini nga si Prefie.
Si Delos Santos matud pa nga dako og kalagot sa barangay tanod human mao kini iyang gidudahan nga maoy misumbong sa kapulisan nga armado siya adtong nagsingabot ang eleksiyon nga miresulta sa pagkasikop niini.
“Tanod kuno ang gasumbong nga armasan siya maong galagot siya pero wala siya makapakita og dokumento sa armas,†matud ni Arbuis.
Kaso nga attempted murder ang nagpaabot kang Delos Santos samtang gitan-aw usab sa kapulisan kung mapasakaan ba nila og kasong obstruction of justice ang kapikas niini.
Nakig-alayon na ang Barili police sa Cebu City Police Office alang sa pagsikop sa suspek. (BANAT NEWS)