CEBU, Philippines - Nalandig sa tambalanan ang duha ka Koryano human sila pamusila sa wala hiilhing mga tulisan didto sa dalan Tres Borces, sa barangay Mabolo, dakbayan sa Sugbo sa miaging gabii.
Ang mga samaran nailhan nga mao sila si Choi Sun Chul, 22, ug Heo Yekang, 37, nga kasamtangang nagpuyo sa usa ka Korean School sa maong dapit.
Sa pasiunang imbestigasyon sa kapolisan nasayran nga ang duha ka Koryano uban sa laing Koryana nga si Anna Chu nagbaklay sa karsada sa maong dapit.
Sa pag-abot nila sa usa ka ngitngit nga dapit adunay duha ka motorsiklong mihunong nga gisakyan sa tag-duha ka tawo.
Unya nanaog ang mga angkas niini nga nagtion sa ilang mga armas de fuego ngadto sa tulo ka mga Korean, dayon mideklarar nga tulis.
Apan tungod kay nagmagahi ang duha ka Koryano ilabi na niadtong gisuwayan sa mga tulisan ang pagdagit sa Koryana, gipamusil sila.
Si Chul naigo sa walang bahin sa nawong dayon gikuha ang iyang cell phone nga balor og P30 mil ug pitaka nga adunay sulod nga P10 .
Samtang si Yekang, naigo sa tuong bahin sa bukton ug gikuha usab sa cell phone nga balor og P15 mil ug kwarta nga nagkantidad og P10 mil .
Ang mga biktima gihatud dayon ngadto sa Cebu Doctors Hospital ug kasamtangan pa kini nga giatiman sa mga mananambal.
Samtang ang nakasaksing si Sanics (ngalan gipugngan), mibutyag sa kapolisan nga iyang nakita ang duha ka motorsiklo nga mibabag sa tulo ka biktima.
Apan gipadayag ni Sanics nga wala siya makaklaro sa nawong tungod kay pulos kini nag- helmet. Hinuon miingon siya nga iyang nakit-an ang dinaliang pag-ikyas sa maong mga tulisan nga nagbitbit pa sa ilang mga armas.
Ang hepe sa kapolisan sa City Intelligence Branch (CIB) Chief Insp. Romeo Santander, mipadayag usab nga local boys lang ang maong mga tulisan.
Milihok na karon sila si Santander aron masikop ang maong mga tulisan. (BANAT NEWS)