Hinabang padayong gidawat sa DSWD
CEBU, Philippines - Ang Department of Social Welfare and Development (DSWD)7 nagpadayon sa pagdawat og mga hinabang nga pagkaon alang sa mga pamilya nga nawad-an og balay tungod sa bagyo nga Pablo.
Matud pa ni Jaybee Binghay, tigpamaba sa DSWD7 nga nagpadayon ang ilang buhatan sa pagdawat og bisan unsang hinabang alang sa mga nabiktima sa bagyo hangtud sa bulan sa Agosto.
Miingon si Binghay nga si DSWD Secretary Corazon Juliano-Soliman mipasabot kanila nga ang maong hinabang gilugwayan pa sa laing duha ka bulan aron masiguro nga aduna silay makaon matag adlaw. Kini mintras nagpangita pa sila og permanenteng panginabuhian.
Sa kasamtangan ang DSWD nakahatag na sa mokabat sa P1.3 bilyon nga hinabang sama sa pagkaon, noche buena packs, financial ug burial assistance, pagtukod sa mga bunk houses, cash-for-work, emergency shelter assistance (ESA), modified permanent shelter ug educational assistance.
Gawas sa mga pagkaon, ang DSWD padayon nga manghatag og cash-for-work assistance aron masustentohan ang pang -adlaw-adlaw nila nga panginahanglanon samtang dili pa sila makakita og tukmang trabaho.
Bayran sila sa kantidad nga P226.00 ang adlaw sulod sa napulo ka adlaw nga pagtrabaho nila sa komunidad.
Mokabat na sa P120,416,320 ang nahatag sa DSWD ngadto sa 68,860 ka mga tawo nga biktima sa bagyo nga Pablo sa nagkalainlaing dapit sa nasud. (/WC) (BANAT NEWS)
- Latest
