PPA miatiman sa mga probationer — Paderanga

CEBU, Philippines - Ang pag-alagad  sa  mga  piniriso   nga  gihatagan  sa kagamhanan  og probation  maoy  labing  mahinungdanon  nga  gimbuhaton  sa  mga  kawani  sa buhatan  sa Parole and Probation Administration (PPA)   sa rehiyon 7.

Mao  kini ang  gibutyag  ni Regional  Director Jeorgette C. Paderanga  atol  sa Kapihan sa  PIA  nga  gipalanog  sa DYMR sa miaging  adlaw.

Gipasabot  ni  Paderanga  nga  matag  semana  moduaw  sila  sa  mga  selda  sa  mga  piniriso  aron  tan-awon  kinsa  kadtong  angayan  na  paaplayon  og  probation.

Matud  niya nga  ang PPA  wa magpili  sa  matang  sa pagkatawo  sa usa ka  piniriso  basta  ang  mahinungdanon  nga  ikasilbi  nila  ang  gitugot  sa kagamhanan  nga  pribilihiyo  niadtong  mosakar  ning  maong  programa.

Usa  sa ilang  tumong  mao  nga kadtong  mga  piniriso  nga  sentensyado  sa pagkabilanggo    nga  kalipikado  nga  kahatagan  og  probation, mao  kini  ang  ilang  kombinsihon.

Pinaagi  niini ilang  tambagan  ang  maong  mga  piniriso  nga  magbinuotan sulod  sa prisohan. 

Kun  motugot  na ang  korte nga  hatagan  sila  og  probation,  hatagan  sila  og  kagawasan  gikan  sa prisohan  ug  adto  nila  tiwasa  ang  ilang  sentensya  sa  ilang  pinuy-anan.

Hinuon  kini  ubos  sa  pag-atiman sa  mga  kawani sa PPA  kinsa  maoy  momonitor  sa    inadlaw-adlaw  nga  kalihokan  sa mga  probationer.

Gani  matud  pa  ni  Paderanga  nga  ilang  gihatagan  og  proyekto  ang  mga  probationer  nga  ubos  sa ilang  pag-atiman.

Kini  pinaagi  sa pagpabuhi  og  baboy,  usa ka proyekto  nga  sila  mismong taga  PPA  ang  mihatag  og  puhonan  aron  ipalit  og baktin  nga maoy  buhion  sa probationer.

Miingon  siya  nga  kadtong  mga  probationer  nga  buotan, dali  rang  madawat  sa iyang  mga  silingan  ug  bisan  niadtong  mga  kihante  niini.

Kini  tungod  kay una  ihatag sa  piniriso  ang kagawasan  sa prisohan  pinaagi  sa probation,  kombinsehon  usab  sa PPA  ang mga  kihante  nga  ihatag  ang  higayon  sa  mga  nakasala  nga  magbag-o  sa ilang  kinabuhi. (BANAT NEWS)