CEBU, Philippines - Nalandig sa tambalanan ang usa ka Korean national ug ang drayber sa traysikol nga ilang gisakyan human sila pamusila sa tulo ka mga tulisan kagahapon sa kaadlawon diha sa eskina sitio Uldog, Ramona Village, barangay San Isidro, dakbayan sa Talisay.
Ang mga biktima mao si Jeong Yoo Jin o “Ujin†sa English niining pangalan, Nam Ok Min o “Minaâ€(babaye) ug Lee Yu Na o “Yunaâ€(babaye) parehong mga Korean nationals nagpanuigon sa 25, 37 ug 24-anyos ug parehong nagpuyo diha sa 195-A-1, sitio Uldog barangay Cansojong, Talisay.
Ang drayber sa traysikol giila nga si Diogracias Dumancas, 46, taga sitio Ilang-ilang, barangay San Isidro, Talisay.
Si Superintendent Resty Santos, officer-in-charge sa Talisay City Police Station mibutyag sa Banat News kagahapon gikan nga nag-inom diha sa usa ka restaurant sa Tabunok ang mga biktima.
Apan dihang miabot na sila diha dapit sa gate sa Cebu Globalization ESL Center Inc, sa Cansojong ang tulo mimando kang Dumancas nga mobalik sa Tabunok tungod kay giingong buot pa silang mag-inom ngadto sa laing restaurant.
Dihang paingon na sila balik sa Tabunok tulo ka mga lalaking sakay sa usa ka motorsiklo misunod kanila ug dayon mition og pusil ug mideklarar og hold-up hinungdan nga ang drayber mipahunong sa traysikol.
Giingong gilabnot sa mga tulisan ang Samsung cellphone ni Yuna nga nagkantidad og P20,000 apan ang biktima nagdumili sa pagbuhi niini hinungdan nga nahitabo ang binirahay sa cellphone.
Apan giingong sa maong linabnihay natumba si Yuna ug nakaangkon kini og mga bun-og sa lawas hinungdan nga mikanaog si Ujin gikan sa traysikol aron unta tabangan sa pagpabarog si Yuna.
Apan gipusil siya sa mga tulisan diha sa iyang tiyan, si Dumancas kinsa motabang usab unta sa iyang mga pasahero giapil sa pagpusil sa mga tulisan ug nakaangkon kini og samad pinusilan sa walang abaga.
Ang mga biktima daling gidala ngadto sa Talisay City District Hospital apan tungod sa ilang kahimtang gibalhin kini ngadto sa Vicente Sotto Memorial Medical Center.
Matud ni Santos nga posibleng nagtuo ang mga tulisan nga ang mga biktima manukol hinungdan nga gipamusil kini.
Gibutyag ni Santos nga usa sa mga nahisgutang tulisan nailhan na human nga ang hulagway niini diha sa rogues gallery gitudlo sa mga biktima nga maoy mitulis kanila, usa ka hot pursuit operation ang gipahigayon batok sa mga suspek. (BANAT NEWS)