Masyador nga namaligya’g shabu tiklo
CEBU, Philippines - Nasikop sa kapolisan ang masyador sa buwangan nga nag-sideline sa pagpamaligya og gidiling drugas didto sa barangay Ticad sa lungsod sa Bantayan isla sa Bantayan niadtong Huwebes sa alas 2:10 sa hapon.
Samtang naangol ang police nga poseur buyer kay gipaak sa suspek nga si Lito Desamparado, 42, masyador sa buwangan ug nagpuyo sa maong lugar.
Mikabat og lima ka pakite sa gituohang shabu ang nasakmit gikan sa suspek, lakip na ang P300 nga buy bust money.
Si PO2 Jeoram Desucatan sa Bantayan Polie Station mibutyag sa Banat News nga ang subject gilit-ag sa mga polis kay taud-taud na kining nahimutang sa ilang watchlist.
Hinuon atol sa buy bust operation si PO1 George Gelbuela kinsa maoy poseur buyer gipaak sa suspek human niini mabantayi nga polis sa Gelbuela.
Sa pagtunol niya sa shabu ngadto kang PO1 Gelbuela misuway siya pagdagan aron moikyas apan nagunitan siya sa polis hinungdan nga iyang giangkab ang dughan niini.
Nalaksi ang panit sa dughan ni PO1 Gelbuela apan nadakpan gyud ang suspek sa mga polis nga diha sa palibot.
Gipatambalan dayon sa hospital si PO1 Gelbuela gumikan sa samad nga iyang nadawat.
Ang suspek nabalhug na karon sa karsel samtang gihikay ang kasong ipasaka batok kaniya. (/WC) (BANAT NEWS)
- Latest
