Rama uyon ipadala ang mga sakyanan sa siyudad sa balay sa kawani sa city hall

CEBU, Philippines - Mas gusto ni Mayor Michael Rama nga ibilin ra anha sa Cebu City Hall ang mga sakyanan human sa oras nga tingtrabaho.

Matud ni Rama nga peligro kaayo kun ang mga sakyanan binuangan pinaagi sa pagpaulbo ginamit ang bomba kay mahurot ang mga sakyanan sa City Hall ingon man dili dayon kini magamit sa emerhensya nga panginahanglan.

Nakahinumdom si Rama nga atol sa iyang pagkabatan-on pa iyang nahinumdoman nga ang mga sakyanan sa gobernador ug ubang opisyal anaa man g’yud sa balay sa opisyal.

Ang Cebu City Hall wala g’yuy parking area sa mga sakyanan mao nga ang pipila sa mga sakyanan nga giisyu sa opisina anha ra iparking sa Plaza Sugbo atubangan sa City Hall.

Sagad sa dul-an sa 1,000 ka sakyanan, apil ang mga motor sa dakbayan, dad-on g’yud sa balay sa mga giisyuhan niini mao nga dili malikayan nga gamiton ang maong mga sakyanan sa personal.

Ang libro nga Property Costudianship sa Commission on Audit (COA) nagtugot nga ang mga sakyanan sa kagamhanan madala ra sa balay sa mga giisyuhan kun ang ahensya o buhatan sa kagamhanan nga tag-iya sa sakyanan walay kaugalingon nga garahe.

Matud ni Rama nga kun ang sakyanan ipadala lang sa mga opisyal ug kawani magamit pa kini sa dinaliang panginahanglan.

Apan gitataw g’yud hinoon ni Rama nga bisan og gipadala ang maong sakyanan sa balay sa mga opisyal ug kawani apan dili kini mahimong gamiton sa personal nga katuyoan. (/EIM) (BANAT NEWS)