CEBU, Philippines - Kritikal ang kahimtang sa German national human kini pusila sa dughan samtang nagpahayahay sa iyang terrace sa balay daplin sa dagat didto sa Sitio Biactus, barangay Pooc, lungsod sa Sta Fe sa isla sa Bantayan niadtong Domingo sa alas 8:30 sa gabii.
Ang biktima mao si James Uwelange, 58 , minyo, German national ug usa ka retiradong sundawo nga nagpuyo sa maong lugar.
Samtang sa paghimo ning balita wala pay natumbok nga responsabli sa krimin tungod sa kangitngit sa kagabhion atol sa pagpamusil.
Si PO1 Isabelo Carasona sa Sta Fe Police Station mibutyag sa Banat News nga ang biktima naanad na nga magpahayahay sa terrace niini human sa ilang panihapon.
Apan samtang nagsandigsandig sa lingkuranan, kalit lang mipaka ang buto sa armas sa ilang palibot.
Sa paglabay sa pipila ka gutlo nalup-og ang biktima hinungdan nga dali kining gitabang sa mga kabanay .
Didto pa mahibaw-i nga samdan sa bala sa walang bahin sa dughan ang biktima ug dali nila kining gidala sa Bantayan District Hospital.
Apan girekomendar sa mga doctor nga ibalhin sa tambalanan sa dakbayan sa Sugbo alang sa tukmang medikasyon.
Ang kapolisan padayon pang nag -imbistigar sa maong hitabo sanglit walay kontra sa lugar ang maong langyaw. Gani gihulagway kini sa iyang mga silingan nga buotan ug manggihatagon.
Sa milabay nga pipila ka buwan may kawatan nga nakasud sa pinuy-anan niini apan nadakpan ug gibilanggo ug gipagawas ra usab human pasayloa sa biktima. (/WC) (BANAT NEWS)