Aussie nadakpang nagdala og lima ka batang lalaki sa resort
CEBU, Philippines - Usa ka Australian national na usab ang gipasakaan og kasong kriminal diha sa piskalya human kini nadakpan niadtong Biyerners sa gabii sa usa ka beach resort sa lungsod sa Compostela.
Atol sa inquest kagahapon, si Hilton Reece Munro, 45, nga taga Shepherd St., Hongkong ug ang usa ka taxi driver nga si Gilbert Andrada, 41, nga taga dakbayan sa Sugbo giabagan sa ilang abogado nga si Lani Villarino sa ilang pagsumitir og waiver of detention.
Si Fiscal Dionilo Mantos mihatag og kinse ka adlaw sa mga akusado sa pagsumitir sa ilang counter-affidavits.
Matud niya nga bisan naa pa o walay counter-affidavit iyang resolbahon ang reklamo sa kalapasan sa Section 10 (b) of Republic Act 7610 o Child Abuse ug kalapasan sa RA 9208 as amended by Expanded Anti-Human Trafficking Act.
Sa pakighinabi sa mga tigbalita, si Villarino wala mohatag og komento bahin sa alegasyon apan kini mipasalig nga ilang tubagon pinaagi sa counter-affidavit ang maong sumbong.
Ang mga suspek nadakpan niadtong adlaw nga Lunes nga dunay kaubang lima ka mga batang lalaki sa maong resort nga nagpangidaron og 10 ngadto sa 13-anyos.
Ang operasyon gihimo sa mga sakop sa Regional Anti-Human Trafficking Task Force. Ang mga bata anaa karun sa Department of Social Welfare and Development. (BANAT NEWS)
- Latest
