CEBU, Philippines - Duha ka sitio sa barangay Mambaling ning siyudad sa Sugbu ang gilamon sa sunog pasado alas 3 kagahapon sa kaadlawon. Ang naugdaw ang kabalayan nahimutang sa sitio Huyong-huyong ug Tinabangay nga giisa dayon sa Task Force Alpha tungod usab sa kadako sa sunog ug kasikit sa mga balay nga sagad ginama sa mixed ug light materials.
Sa pakighinabi sa Banat News ni Cebu City Fire Marshall, Chief Insp. William Tacaldo mipadayag kini nga nagsugod ang kalayo sa panimalay sa usa ka Ester Cabonero.
Giingong dali kaayo kining mikatap ngadto sa mga silingang panimalay ug mitapon sa silingang sityo.
Usa ka oras una pa nakontrolar sa kabomberohan ang maong sunog nga milamoy sa kapin 60 ka panimalay ug di muminos mokabat sa 600 mil pesos ang danyos.
Ang Department of Social Welfare Services mibutyag nga 87 gyud ka panimalay ang naugdaw.
Usa ka Joy Empinado maoy unang nakamata human makabantay sa kaigang sa palibot ug daling misinggit sa mga silingan nga dunay sunog. Si Empinado way nadala bisan usa ka gamit tungod sa kadako na sa sunog.
Sa laing bahin, naguba ang usa sa mga dagkong fire trucks sa Cebu City tungod kay nagkasangit-sangit sa mga balay nga gipangtukod diha kilid sa piot kaayong dalan, nadugangan pa ang problema tungod sa mga ubos kaayong nagkutay-kutay nga wirings nga murag mga pansit. Gihulagway ni Tacaldo nga delikado gyud ang dapit tungod sa kahuot sa agianan ug dako kaayo ang purohan nga kung anha sa duol sa dalan mahitabo ang sunog maglisod na og gawas ang mga nagpuyo sa maong dapit.
"Pwerting lisora, piot kaayo nang dalana diha unya duna gani nga firetrucks naputol ang storage box for chemicals kay nasangit sa kuryente. Grabi ka delikado ang lugar. Ila pang mga atop na-encroach pa sa karsada," matud pa ni Tacaldo.
Samtang si Mayor Michael Rama, dali usab nga misusi sa lugar kini aron sutaon ang mga kahimtang sa mga nasunogan nga kasamtangang anaa una gipahimutang sa gym sa maong barangay.
Gipaabot nga dunay reblocking nga pagahimoon sa maong lugar sama sa mga gipanghimo ni Rama sa mga residential areas nga nangasunogan aron mabutangan og access roads alang sa mga emergency vehicles. Sa laing bahin, usa ka single-type apartment ang naugdaw diha sa dalan M.L. Quezon sa barangay Cabancalan, dakbayan sa Mandaue sa miaging gabii nga
Gipanag-iya ni Betty Cobonque nga giingon nga gipaabangan kaniadto apan Abril pa niining tuiga nabakante.
Si SFO3 Roy Codilla, imbestigador sa BFP-Mandaue mibutyag sa Banat News nga unang nasunog ang panimalay ni Cobonque ug mitapon sa tapad nga panimlay nga gipanag-iya ni Adolfo. Hinuon nakontrolar kini paglabay og 20-minutos.
Ang duha ka insidente sa sunog sa siyudad sa Sugbu ug Mandaue wala pa mahibaw-i ang hinungdan, hinuon walay na-report nga nakalas sa maong mga hitabo. (BANAT NEWS)