CEBU, Philippines - Gikatakdang pasakaan og kasong robbery ugma, Lunes ang nadakpan nga suspetsado sa pagpanglungkab sa usa ka water refilling station sa barangay Alang-Alang, dakbayan sa Mandaue sa miaging kaadlawon.
Kini ang nasayran sa Banat News kang Roldan Balimbing sa Investigation and Detection Management Bureau (IDMB) sa kapolisan sa Mandaue City Police Office (MCPO) sa follow up nga gihimo kagahapon.
Matud pa ni PO2 Balimbing nga ang ilang pasakaan og kaso mao si Noel Ytang Pepito, hingkod, nga taga sitio Lapyahan, barangay Labogon sa maong dakbayan.
Ang dinakpan nga si Pepito ug laing duha pa ka mga kauban kansang ngalan gipugngan sa kapolisan kay nagpadayon pa sa ilang follow up operation. Ang tulo ka mga kawatan nakasulod sa maong establisemento pinaagi sa pagguba sa pultahan ug bintana sa maong refilling water station.
Si PO2 Balimbing miingon nga si Pepito ilang nadakpan nga didto pa sa sulod sa Living Water Refilling station nga mitago human ang laing duha ka mga kauban miikyas pinaagi sa pag-ambak sa taas nga koral.
Dugang pa niya nga ang maong dinakpan mao usab ang nagtug-an ngadto kanila kalabot sa tipik sa kuwarta nga ilang nasakiyo nga natagak sa yuta nga nagkantidad og P21,700 sa paglayat sa iyang kaubang kawatan .
Ang maong kantidad nga natagak og napunit sa mga polis maoy bahin sa kuwarta nga nagkantidad og P212,000 nga nasakiyo sa mga kawatan nga kauban ni Pepito. (BANAT NEWS)