CEBU, Philippines - Kritikal ang kahimtang sa usa ka lalaki nga gipusil samtang nagpaingon na siyang mopauli sa ilang balay sa Sityo Lomboy barangay Abucayan sa lungsod sa Balamban sa miaging kaadlawon.
Ang biktima mao si Ulise Lami, 34, nagpuyo sa maong lugar apan lumad nga taga Negros Occidental.
Samtang ang suspek giila nga si Alberto Eras Jr., 35 , ulitawo, ug molupyo ra usab sa maong dapit.
Si PO1 Jomelon Abarquez sa Operations Branch sa Cebu Police Provincial Office (CPPO) nagkanayon nga ang biktima nag-inusara nga naglakaw sa dalan paingon sa ilang balay sa maong higayon.
Apan ang suspek nga gikasugat sa biktima sa dalan kalit nga mibunot sa iyang armas de fuego ug gipusil ang biktima sa makadaghang higayon.
Naigo sa nagkalain-laing bahin sa lawas ang biktima ug ang suspek daling miikyas human sa hitabo ug padayon pa ang hot pursuit operation aron sa pagsikop niini.
Samtang ang biktima gihatud dayon sa Balamban District Hospital apan tungod sa seryuso nga kahimtang gibalhin kini sa tambalanan sa dakbayan sa Sugbo. Wala pa matumbok sa kapolisan ang motibo sa krimin. (BANAT NEWS)