Ordinansa nga makatabang kontra cyber sex gipanday na sa Hunta
CEBU, Philippines - Gisugdan na sa pagpanday sa Hunta Probinsiyal sa Sugbo ang balaudnon sa paggukod sa mga padalhanan og kwarta may kalambigitan sa mga kaso sa cybersex crimes.
Kini isip tubag sa panawagan ni Cordova Mayor Adelino Sitoy nga kinahanglang ilakip sa mga operasyon ang mga padalhanan og kwarta sa mga imbestigasyon sa maong kaso.
Ang iyang anak nga si Bokal Arleigh Jay Sitoy ang niduso na sa iyang ordinansahon nga magsilot sa tag-iya, opisyal ug mga tagdumala sa mga money transfer outlets nga mamatud-an nga gigamit nga agianan sa kwarta gikan sa laing lugar padulong sa mopahigayun sa cybersex.
Ang ordinansahon anaa na sa komitiba sa pamalaud nga gipangulohan ni Bokal Joven Mondigo Jr. Ubos sa maong ordinansahon, kadtong masakpang molapas niini silutan sa pagkabilanggo sa usa ka tuig o kaha multa nga P100,000 depende kung asa ang imando sa korte gawas pa sa pagpakanselar sa ilang business permits.
Nagtoo si Bokal Sitoy nga mahadlok na ang mga money transfer outlets kung iapil sila sa kaso.
Unang gisugyot ni Mayor Sitoy nga ma-regulate ang mga money transfer sa ilang lungsod ug hatagan usa og gahum ang lokal nga kagamhanan nga makasusi sa maong negosyo.
Gisugyot usab ni Bokal Jose Ribomapil Holganza Jr. nga angayan mohimo usab og ordinansahon ang lungsod.
Base sa talaan sa kapolisan, ang susamang mga kaso nahitabo usab sa mga ubang dapit sa Sugbo sama sa Dumanjug, Cordova, Pinamungahan, Balamban, Toledo City, Daanbantayan, Bogo City, Consolacion, Minglanilla ug Argao sukad pa niadong 2008 hangtud karon. Nabantog ang Cordova sa maong kaso sanglit mas daghan ang operasyon nga napahigayun sa maong lugar. (BANAT NEWS)
- Latest
