CEBU, Philippines - Daghang mga tawo nga adunay apan sa ilang panglawas kon Persons with Disabilities (PWD) ang nag-ampo nga ihatag na kanila ang ilang cash assistance gikan sa Cebu City government, apan dihang gihatag na kini, dunay 580 nga wa mokubra.
Si Leonilo Omayan, presidente sa PWD Federation sa dakbayan sa Sugbo wala makahatag og tukma nga pagpasabot nganong daghan kaayo sa iyang mga sakop ang wala mokubra sa ilang cash assistance.
Matud ni Ester Concha, hepe sa City Hall Department of Social Welfare and Services (DSWS), nga posible nga ang maong mga PWD’s wala na dinhi magpuyo sa dakbayan sa Sugbo.
Dunay nagduda nga sama sa mga senior citizens, daghan usab sa mga PWD nga nakaparehistro dinhi sa dakbayan sa Sugbo bisan og wala na sila dinhi magpuyo.
Matag usa ka PWD dinhi sa dakbayan sa Sugbo gigahinan og tag P5,000 nga cash assistance karong tuiga ug ang P3,000 gihatag na kanila niadtong hinapos sa miaging Mayo.
Base sa statistics nag-anam og kadaghan ang mga PWD’s nga narehistro dinhi sa dakbayan ug miabot na karon og kapin sa 12,000.
Sa miaging bulan sa Mayo, kapin ra sa 8,000 kanila ang mi-qualify nga mahatagan kay ang uban wala makakompleto sa dokumento.
Apil sa maisip nga PWD mao kadtong mga tawo nga walay apan sa physical nila nga panglawas apan may deperensya ang ilang panan-aw ug dili makakita kun walay antipara nga 400 ang grado.
Matud ni Concha wala na sila’y tinguha nga mohatag pa og dugang usbaw sa cash assistance sa mga PWD’s para sa sunod tuig kay bag-ohay pa sila nga gipausbawan gikan sa P3,000 ngadto sa P5,000. (Rene U. Borromeo/EIM) (BANAT NEWS)