CEBU, Philippines - Gusto ni Mayor Michael Rama nga pulihan sa iyang puwesto si Acting City Treasurer Emma Villarete mao nga miduso siya og ngalan sa tulo ka tawo aron kapilian sa mga opisyal sa Bureau of Local Government-Finance.
Ang ngalan nila ni kanhi acting city treasurer Ofelia Oliva, ni Mandaue City treasurer Regal Oliva ug Cebu City acting Accountant Diwa Cuevas maoy giduso ni Rama didto sa BLGF-7 regional office.
Matud ni Rama nga ang lagda nga gilatid sa Section 470 sa Local Government Code naghatag og katungod sa mga mayor o gobernador nga mosumiter og labing minus tulo ka eligible nga recommendees para itudlo nga treasurer.
Kun ang treasurer matudlo na sa maong katungdanan ibutang sila ubos sa administrative control sa mga mayor o gobernador.
Gusto kaayo si Rama nga si Oliva matudlo pagbalik nga treasurer sa dakbayan sa Sugbo mao nga ang ngalan ni Oliva anaa gayud sa numero uno sa listahan.
Ikaduha sa listahan ang ngalan ni Regal nga anak ni Oliva ug ikatulo lang si Diwa Cuevas.
Matud ni Rama sa iyang suwat nga gipadala kang BLGF Executive Director Salvador del Castillo nga aduna siya’y dakung pagsalig sa maong tulo nga iyang girekomendar nga mahimong treasurer.
Ang treasurer niining panahona gikinahanglan kaayo ni Rama kay karong mga buwana mao ang pag-andam sa Annual Budget para sa sunod tuig ug ang City Treasurer usa sa mga molangkob sa Local Finance Committee. (Rene U. Borromeo/WC) (BANAT NEWS)