CEBU, Philippines - Ang bag-ong administrasyon karon sa dakbayan sa Talisay mangita og pamaagi sa pagsulbad sa daling panahon sa problema sa baha diha sa barangay Cansojong ug Poblacion.
Kini tungod sa pagsige og baha sa nahisgutang mga barangay bisan hinay lang ang pag-uwan gumikan kay nasuta nga wala diay kagawsan ang tubig.
Si Talisay City legal officer, Alfredo Sipalay sa pakighinabi sa mga tigbalita kagahapon nagkanayon nga ilaha nang gisubay ang Cansojong ug didto nahibaw-an nga ang natural nga lutsanan sa mga tubig natukoran na og kabalayan.
Si Sipalay nagkanayon nga ang maong proyekto ilakip nila kini sa “first 100 days†sa paglingkod ni Mayor Johnny De los Reyes.
Matud niya nga estoryahon nila ang mga residente diha sa lugar ug mga tag-iya sa luna ug hangyoon apan kung dili mosugot ang mga tag-iya og luna nga anha paagion ang tubig diha sa ilang lote bayran na lang kini sa gobiyerno.
Kahinumduman nga ang mga residenteng apektado mipasangil sa usa ka bihon factory nga mopagawas og tubig atol sa kusog nga bunok sa uwan hinungdan sa pagbaha.
Si Sipalay positibo kini nga masulbad ang maong problema ug gihimo niyang sanglitanan ang gihimo ni Mayor Michael Rama sa problema sa baha sa barangay Tagunol-Inayawan sa dakbayan sa Sugbo nga kanunay usab kaniadtong moubog sa baha. (/EIM) (BANAT NEWS)