Killer sa babayeng gipatay sa naga posibleng nag-angkas kaniya

CEBU, Philippines - Igo sa duha ka baga maoy na-ingnan sa hinanaling kamatayon sa biktimang si Joanne Lariosa kinsa napalgang nagbuy-od nga wala nay kinabuhi pasado alas-10 niadtong Martes sa gabii diha sa sitio Inamuan barangay Pangdan dakbayan sa Naga.

Ang medico legal sa kapolisan Dr. Nestor Sator nga maoy misusi sa kalawasan  sa biktima mipasabot sa Banat News nga ang biktima nakaangkon og samad pinusilan sa walang bahin sa iyang likod dapit sa abaga .

Dugang pa ni Sator nga paubos ang direksyon sa pagpusil diin miagi kini sa duha ka baga sa biktima ngadto sa “aorta”  ug milapos ngadto na sa dughan sa biktima diin ang bala narekober sa gisuot nga bra niini.

Padayag pa ni Sator nga gidul-itan sa pagpusil ang biktima tungod usab sa ilang nasuta nga daghan kaayong powder burns sa samad niini.

Gani, usa sa mga gidudahan nga posibilidad ni Sator nga posibling angkas lamang sa biktima ang mamumuno nga posibleng migamit og kalibre .38 o ba kaha sa .357 sa pagpatay sa biktima.

Samtang si PO2 Gilmer Noval sa Naga Police mipadayag usab nga padayun pa sila karun nga nagpahigayon sa halawom nga imbestigasyon.

Gani, didto sila sa lungsod sa Toledo partikular na niini sa Lutopan kini human nila masayri nga didto katapusang nakit-an ang biktima.

Ang kapolisan sa Naga mipahibalo nga duna na silay lead kun si kinsa ang mga gikatahapang mipasipala sa biktima, kini samtang ang banay ni Lariosa nanawagan og hustisya sa kamatayon niini.  (/EIM) (BANAT NEWS)