CEBU, Philippines - Duha ka gidudahang nalambigit sa ilegal nga drugas ang nadakpan sa mga sakop sa Special Weapons and Tactics sa kapolisan sa siyudad sa Lapulapu diha sa dalan M.L. Quezon sa Brgy. Pusok dakbayan sa Lapulapu sa milabay’ng gabii.
Ang mga nasikop mao sila si Michael Matidios, 33, residente sa Brgy. Mactan ug Joggary Juezan, 29 , residente sa Brgy. Pajo dakbayan sa Lapulapu.
Matud pa ni Insp. Vernino Noserale, hepe sa SWAT sa Lapulapu City Police Office nag-roving sila niadtong tungora dihang ilang nasundan ang duha ka tawo nga luwan sa usa ka “kalabira†nga motorsiklo ug pulos wala mag-helmet ug kadudahan ang mga lihok maong ilaha kining gigukod.
Dihang ilang naapsan, girekisa ang duha ug nadiskubrehan nga duna sila’y gidalang 95 ka gagmay’ng pakete sa gituhuang shabu, drug paraphernalia ug upat ka bala sa kalibre 38.
Nasuta nga walay lisensiya nga nagmaniho si Matidios ug wala say rehistro ang motorsiklo, nasayran usab nga dunay warrant of arrest si Matidios tungod sa kasong murder ug physical injuries. (BANAT NEWS)