Cebuana ug mga anak apil sa mga pasahero sa Asiana airlines

CEBU, Philippines -  Gikompirmar sa Department of Foreign Affairs na sakay sa nahagsa nga Asiana Airlines didto sa San Francisco, California ang usa ka Cebuana ug ang iyang duha ka anak.

Hinuon, matud sa report sa ABS-CBN, naluwas ang Cebuana ug ang iyang mga anak.

Sa pakighinabi sa pamilya ni Maricel Anino-Knaus sa ABS-CBN Cebu, nakaangkon og daghang samad si Maricel ug ang iyang duha ka anak, si George 7 years old ug si Gabriel 5 years old.

Matud sa iyang pamilya, nagbakasyon ang pamilya diri sa Cebu og usa ka buwan. Ang bana ni Maricel nga si Carl kuyog sad apan niuna og uli sa niaging semana.

Si Carl kuno ang nanawag nila ug nibalita sa kahimtang sa ilang igsuon matud sa sister-in-law ni Maricel nga si Maria Lourdes. Si Maricel kapin napu na kuno ka tuig nagpuyo sa Estados Unidos.

Matud sad sa report sa DFA gahapon, duha sad ka magtiayon ang sakay sa eroplano ug nakaluwas sad.

Sa report sa ABS-CBN, niingon si DFA spokesperson Assistant Secretary Raul Hernandez nga si Ruben ug Belen Vallero luwas na ug nakagawas na sa ospital.

Ang Asiana Airlines nahagsa niadtong Sabado sa San Francisco California airport ug hangtod karon nagpadayon pa ang imbestigasyon aron mahibaw-an ang rason sa pagkahagsa.

Sa pasiunang imbestigasyon nuon matud sa Yahoo news, ubos kuno og 25 percent sa angay nga gitas-on sa paglupad ang eroplano sa wala pa siya mo-landing.

Duha ka Chinese national ang namatay sa pagkahagsa ug kapin 180 ka pasahero ang samaran. (BANAT NEWS)