CEBU, Philippines - Nagtingkagol sa karsel ang lima ka tawo human masikop sa managlahi nga operasyon sa kapolisan sa nagkalainlaing lugar dinhi sa Sugbo ug oras sa miaging adlaw.
Pasado alas 6:00 sa kagabii, ang kapolisan sa Cebu City Anti Illegal Drugs Special Task Group mipahigayon og buy bust operation sa Purok 8, barangay Camputhaw, batok sa tulo ka mga lalaking mamaligyaay og ginadiling drugas.
Gipalitan sa kapolisan og managlahimg gidak-on nga putos sa shabu ang mga dinakpan ug sa pagtunol niini sa maong butang gisikop dayon sa mga otoridad.
Ang mga nasikop mao sila si Donal Policar, kinsa nakuhaan og lima ka gagmay’ng paketi sa gituohang shabu nga nagkantidad og P300.
Laing nasikop mao sila si Rodrigo Lerion, 50 ug Loreto Repollo, kinsa pulos nasakmitan og 20 ka gagmay’ng paketi sa shabu nga gibana-banang mokabat sa P6 mil ang street value .
Lakip usab nga nakuha mao ang dul-an P2 mil nga kantidad sa kwarta nga gidudahang halin sa maong mga baligya.
Ang tulo dihang gipangutana miangkon nga igo lang sila nga nangomisyon ug dili gayud sila ang namaligya niini.
Samtang sa laing bahin, ang kapolisan sa Public Safety Company (PSC) nakasikop usab og duha ka mga batan-on nga maoy responsabli sa pagpangawat og mga piyesa sa motorsiklo.
Sa miaging hapon, ang kapolisan sa PSC nakasikop sa duha ka tawo didto sa barangay Busay kinsa mihinay-hinay unta sa pagkuha sa usa ka motorsiklo nga giparking sa usa ka balay apan naapsan kini sa tag-iya ug gipasikop sa kapolisan.
Ang nasikop mao sila si Michael Gacayan, 20 ug Dexter Java, 18, nga pulos taga barangay Guadalupe, dakbayan sa Sugbo.
Ang imbestigador sa Public Safety Company nga si SPO3 Alexander Dalion mipadayag nga ang modus sa duha mao nga ilang taymingon nga mingaw ang dapit ug walay tawo dayon hinay-hinayon niini ang pagkuha sa mga parti sa motorsiklo.
Gawas niini, aduna usay higayon nga may moduol kanilang kostumer nga mangita og parti sa motorsiklo diin mao kini ilang ibaligya. Gihulagway usab ni Dalion nga dili lang kay ang duha ang mihimo sa modus kundi grupo kini sila kinsa padayon pang gipangita sa kapolisan ang ilang lider.
Hinoon ang duha ka dinakpan wala mohimakak sa maong pasangil apan ilang giklaro nga grupo sila ug bag-ohay lang sila nga nahasulod sa maong bisyo tungod kay nadala sila sa barkada. (BANAT NEWS)