Kasaulogan sa nutrition month gipangandaman sa NNC

CEBU, Philippines - Gipangandaman  sa National  Nutrition Council (NNC)  ang  ilang  programa  ning  buwan  sa Hulyo  isip kasaulogan sa nutrition month.

Matud  pa  ni  Dave  Bargamento, nutrition officer (NO) II  sa NNC, nga  kadugtong  nila  kanunay  ang    Department  of Agriculture (DA)  sa  ilang  mga programa.

Gani  nagkanayon  siya  kagahapon  nga  ang tema  sa ilang  kasaulogan  karon mao  ang  “Kagutom ug Malnutrisyon Hunongon”  nga  kini  nagpasabot  nga  gikinahanglang  mokaon  og  sustansyadong  pagkaon  ang  tawo  alang  sa pagmintenar  sa maayong  panglawas  niini.

Miingon  sa Bargamento  nga  sa pagkakaron  gisandig  sa  NNC  ang  ilang  programa  sa  mga  pagkaon  nga  gikan sa kaumahan.

Iyang  giawhag  ang  mga  hamtong  nga  atimanon  ang  mga  kabataan  gikan sa mga  masuso  pa  ug  hangtud  nga  mag-eskuyla  na  sila  aron  maugmad  ang  ilang  panglawas  ug  pangutok.

Kini  tungod  kay  diha  sa abunda  nga  sustansya  sa  panglawas,  mao  kini  ang  maghatag  og  kalagsik  sa lawas  kanunay  sa tawo.

Miingon  si  Bargamento   nga  ang  utanon, prutas,  lagutmon  ilang  gipaila  kanunay  ngadto  sa  mga  kabataan  aron  himsog  ang  ilang  lawas  ug  pangisip  sa tanang  higayon.

Ang NNC  padayon  sa  pag-awhag  sa mga  ginikanan  nga  ihatag  sa ilang  mga anak  ang  sustansyadong  pagkaon  sa kanunay.

Kining  mga  sustansyadong  pagkaon  naa  maggikan  sa  mga  prustas,  utan, lagutmon,  nga  gikan  sa kaumahan.

Alang  kang  Bargamento  nga  ang  nasud  nga busog  ug  lig-on  magsukad  sa  busog  ug sustansyadong  mga  molupyo  niini. (BANAT NEWS)