Gipusil patay sa wala ilhing kriminal

CEBU, Philippines - Namatay ang  usa   ka ulitawo  human  pusila  sa  wala  hiilhing  kriminal  samtang  naglingkod  sa  bangko  kilid  sa tindahan didto  sa sitio Cambulihan, barangay  Ilihan, siyudad  sa Toledo,  niadtong  Sabado  sa gabii.

Ang  biktima  nailhan  nga  si Rogelio  Barangan, 25, ulitawo  ug nagpuyo  sa maong  lugar.

Matud  pa  ni SPO4 Carmilito  Hornales, Desk Officer  sa Toledo City Police Station  nga  nag-inusara  ang  biktima  sa maong  higayon  nga  ingon  og  sa adunay  gipaabot  sa kilid  sa tindahan  ni Emily  Cantalejo.

Apan  taud-taod  kalit   lang  miabot  ang  usa  ka motorsiklo  nga  gisakyan  sa nagbinugtong  nga   tawo  kinsa  nagbangot  og  panapton sa iyang  dagway.

Mikanaog  kini  sa iyang  motor  nga  kalma  kaayong  miduol  sa nahimutangan  sa biktima.

Pag-abot  sa usa  ka metro  nga  distansya  kalit kining  milanit  sa iyang  armas  de fuego  ug  gitirohan  tulo  ka higayon  ang  biktima.

Naigo  sa ulo  ug  dughan  ang  biktima  ug  deretso  kining  natumba  sa yuta.

Dayon  gibiyaan  sa  kriminal  kinsa  mipasirit  sa iyang  sakyanan  pahilayo  sa maong  dapit.

Ang  mga  molupyo  sa palibot  sa maong  lugar  maoy  midali  sa pagduol  sa   biktima.

Apan  ang  misakwat  niini  ug  mihatud ngadto  sa  Carmen Copper  Hospital  mao  si Jessie Alpar  nga  amigo  usab  sa biktima.

Apan  pag-abot  niini didto  sa maong  tambalanan  gipaderetso  kini  sa dakbayan  sa Sugbo  apan  samtang  nagpaingon  sila  sa  siyudad  namatay na  sa sulod  sa ilang  gisakyan  ang  biktima.

Padayon  pang  giimbistigar  sa kapolisan  ang  maong  hitabo  aron pagtumbok  sa mipatay  sa biktima. (BANAT NEWS)