Talisay tukoran og solar power plant?

CEBU, Philippines - Ang dakbayan sa Talisay giaghat bahin sa katukoran sa solar power plant pagtubag sa climate change.

Alang sa kasulbaran sa climate change ang Climate Change Commission (CCC) nagplano  bahin sa pagbalhin sa fuel system sa nasud ngadto sa 100 porsiyento nga limpiyo ug renewable energy system nga nakitang makasulbad sa climate change.

Si Secretary Heherson Alvarez uban   ni Marc Cools, representante sa Hi-Tech Lightning World Corporation  (HLWC)  mibisita  sa buhatan ni Mayor Johnny de los Reyes sa milabay’ng  adlaw.

Si Alvarez mipili sa Talisay nga maoy unang siyudad sa nasud nga mogamit sa solar energy.

Si Cools misugyot  bahin sa katukoran sa Solar Power Plant  sa 10 ka ektaryang luna  nga  gahinan  og  mokabat  sa 100,000 Euro o P580 milyones.

Ang kompaniya maoy moabaga sa tanang galastohan apan ubos kini  sa kondisyon    kung unsay nasabotan tali sa kagamhanan sa siyudad.

Giingon  nga  kung ang maong proyekto matuman ang siyudad makabaton  og P10 milyones nga income   nga  mosustiner  sulod sa 15 ngadto sa 20 ka tuig.

Ang renewable energy system giingong motanyag  og barato nga suplay sa kuryente diin posibleng makadani  sa mga investors.

Ang package sa maong proyekto naglakip sa light design, durability ug ubos nga maintenance.

Si De los Reyes nagkanayon  nga andam siyang muhangop sa maong proyekto apan nanghinaut siya nga ang mga sakop sa konseho mosuporta sa implementasyon niini. (BANAT NEWS)