CEBU, Philippines - Mas milig-on karon ang pagduda sa Cebu City Police Office nga may kalambigitan gyud sa investment scam nga Aman Futures ang pagbanhig sa pamilya ni Dr. Rico Medina diha sa barangay Labangon kapin usa ka semana na ang milabay.
Si Chief Insp. Romeo Santander, hepe sa City Intelligence Branch mibutyag nga usa sa mga gidudahang tawo nga nalambigit sa suway pag-kidnap sa pamilyang Medina ang mipadala og suwat sa CIB.
Matud pa nga ang maong tawo miesplikar nga buot lang kining maningil o mokolekta sa abot sa iyang gi-invest sa Aman Futures nga diin usa si Medina sa mga executive directors didto sa Pagadian City.
Ang pamilyang Medina nga gilangkoban ni Dr.Rico Medina, asawa niining si Arlene ug anak nga si Benjie ug ang ilang bodyguard padung na pauli sa ilang balay sa West City Homes sa Banawa barangay Labangon dihang kalit nga gibabagan sa duha ka mga sakyanan kapin usa ka semana na ang milabay.
Apan inay nga mohunong gidaro ni Benjie ang sakyanan sa mga gikatahapan hinungdan nga girakrakan sila sa lima ngadto sa unom ka mga lalaking sakay sa usa ka Innova ug usa ka Toyota Vios.
Narekober sa kapolisan ang duha ka sakyanan ug laing usa ka van dili layo sa nahitaboan nga dunay mga armas, mga posas, masking tape ug uban pa.
Tungod sa maong suwat, dako ang pagtuo ni Santander nga may kalambigitan gyud sa Aman Futures ang maong hitabo.
Hangtud ning pagbalita, wala pa gihapoy miyembro sa pamilyang Medina ang mibisita sa buhatan sa kapolisan aron mohatag og mga pamahayag kalabot sa nahitabo. (Lesley Caminade/EIM) (BANAT NEWS)