CEBU, Philippines - `Gisuspenso sa Office of the Ombudsman-Visayas ang usa ka empleyado sa Lapu-lapu City Engineering’s Office sud sa unom ka buwan human mapamatud-ing guilty sa kasong administratiba tungod sa pagpakasal niini duha ka higayon sa managlahing babaye.
Ang graft investigation and prosecution officer nga si Corazon Arnado-Carillo nagkanayon nga base sa ilang imbestigasyon sa kaso nga gipasaka ni Aida Villarin, kanhi live-in partner sa gireklamong si Marcelo Ybañez Jr. nakita nilang duna kini basihan aron manubag ang maong kawani.
Matud pa nga guilty si Ybañez tungod sa nahimong “disgraceful and immoral conduct.â€
Ang kanhi kapuyo sa gireklamo nga si Villarin misang-at batok kang Ybañez human iyang nadiskubrehing kaduha na nagpakasal sa lainlaing babaye ang lalaki.
Si Villarin mibutyag sa iyang affidavit nga duna silay duha ka mga anak ni Ybañez dihang gibiyaan sila niini niadtong Abril tuig 2010 kay nikuyog og laing babaye. Matud niya nagkinahanglan siya og sustento sa mga bata.
Niining bag-ohay lang niya nahibaw-an nga gikasal sa usa ka Avelina Gorumba niadtong Nobiyembre 20, 1971 si Ybañez ug gikasal usab kini sa usa ka Consolacion Muga niadtong Oktobre 1, 1993.
Apan sa counter-affidavit ni Ybañez, iyang giangkon nga kaduha siya nagpakasal apan nagtuo siya nga na-dissolved na ang una tungod kay 20 ka tuig silang wala nay komunikasyon ni Gorumba, apan usa ka tuig human niya pakasli si Muga nagkabuwag na usab sila.
Si Carillo miingon nga nakakita siya og igong basehan aron suspensuhon ang maong kawani. (BANAT NEWS)