CEBU, Philippines - Gumikan sa selos, kritikal ang kahimtang sa usa ka babaye nga gidunggab sa laing babaye didto sa sitio Abuno sa barangay Pajac, dakbayan sa Lapulapu sa miaging gabii.
Ang biktima mao si Maria Rosalie Bustillo, 33, dalaga, nga nagpuyo sa maong dapit .
Samtang ang suspetsado giila usab sa kapolisan nga si Neckulyn Maputol, 32, dalaga, nga lumad nga taga dakbayan sa Surigao.
Si PO2 Winston Ybanez sa homicide section sa kapolisan sa maong dakbayan nga nahinabi sa Banat News miingon nga naglakaw pauli sa ilang balay ang biktima, dihang pag-abot sa maong lugar kalit kining gihamag sa suspek ug giluba sa Batangas knife.
Nabulit sa daghang samad ang lawas sa biktima busa dali nga gihatud sa mga silingan ngadto sa Lapulapu District Hospital.
Gumikan sa katalandugon sa iyang kahimtang, dali usab kining gibalhin ngadto sa Vicente Sotto Memorial Medical Center sa dakbayan sa Sugbo.
Matud pa ni PO2 Ybanez nga dali silang mipahigayon og hot pursuit operation nga miresulta usab sa pagkasikop sa maong suspetsado ug karon gibalhog na kini sa bilanggoan.
Si PO2 Ybanez miingon nga sa ilang imbestigasyon nga gihimo ilang nasuta nga pangabubho ang hinungdan sa maong pagpanunggab.
Nasuta usab nga ang kanhi hinigugmang lalaki sa suspetsado gikapuyo na karon sa biktima. (BANAT NEWS)