CEBU, Philippines - Usa ka ulitawo nga sakop sa Crips gang ang naangol human kini pusila sa wala hiilhing kriminal samtang naglakaw gikan sa diskohan didto sa Sitio Malbago barangay Luyang, sa lungsod sa Carmen sa miaging kaadlawon.
Ang nabiktima mao si Jesrel Quilaton Ampong, 19, ulitawo, membro sa Crips gang, nga nagpuyo sa barangay Cogon, East Carmen.
Si PO1 Everett Capuyan sa Carmen Police Station mibutyag sa Banat News nga ang biktima kauban sa iyang mga barkada gikang mitambong og disco sa sitio Malbago nga nagpista sa maong higayon.
Apan dihang paingon na unta silang mamauli subay sa ngitngit nga lugar, kalit lang nipaka ang lanog nga buto sa armas de fuego.
Dangtan og pipila ka gutlo namatngonan sa biktima nga namanhud ang tuo niyang paa. Dihang iyang gisusi naigo diay kini sa bala sa maong pagpamusil.
Gihatud dayon kini ngadto sa Danao City District Hospital ug luwas na hinoon sa piligro nga kahimtang.
Bangi sa magkaribal nga fraternities ang sentro karun nga gisubay sa nagpadayong imbistigasyon sa kapolisan sa maong lungsod.
Kini maoy posibling motibo tungod kay sakop man sa Crips gang ang biktima. (BANAT NEWS)