Driver sa motor nga midasmag sa minibus kritikal

CEBU, Philippines - Kritikal ang kahimtang sa  usa ka  lalaki human kini modasmag  sa gikasugat  nga  minibus didto sa highway sa barangay Dawis Sur, sa lungsod sa Carmen niadtong Sabado sa alas 6:10 sa buntag.

Ang  nabiktimang drayber sa motorsiklo nga Honda 100 mao si Ervin Galing-Galing, 28 ug taga barangay Banilad, siyudad sa Mandaue.

Samtang ang drayber sa minibus nga pasaheroan nga  adunay rota nga Carmen- Cebu mao  si Gemenacio Morales, 37, minyo  nga  taga  barangay  Baring.

Ang  tag-iya  sa maong  minibus  mao  si Archie Montsoto,  nga taga Danao City

Si PO2 Jerome Qiunque sa Carmen Police Station mibutyag  sa Banat News   nga  ang mini bus ug motorsiklo  nagkasugat   kay  ang minibus paingon sa habagatang bahin, samtang sa amihanan  usab   ang dereksyon sa motor.

Subay sa inisyal nga imbistigasyon, ang  drayber sa  minibus   mibutyag  nga   sa  layo-layo  pa  og  dyutay, nakamatikod na  siya sa kusog nga pagpadagan sa motor nga mitipas sa iyang linya,  busa  gipahunong dayun  niya  ang iyang sakyanan.

Apan   gidasmagan  ang  dong  niini    sa motorsiklo  sa biktima.

Gumikan  sa kakusog  nga  pagkadasmag   milupad  ang  drayber  buwag sa iyang motor  ngadto sa windshield sa mini bus. Nabuak  ang   helmet  niini ug  mitugpa  sa karsada  nga  nagkadugo na.

Dali  kining gihatud  ngadto  sa  tambalanan sa Danao City District Hospital apan gi-transfer dayun sa tambalanan  sa dakbayan sa Sugbo alang sa tukmang medikasyon.

  Ang  drayber  sa  minibus  mitahan  usab dayon sa kapolisan  sa Carmen  ug  gipaabot  ang  imbistigasyon   sa kapolisan.  WC (BANAT NEWS)