CEBU, Philippines - Gipadakop ug gipapriso sa iyaan ang pag-umangkon niini nga miunay og kawat kaniya didto sa barangay Manguto sa lungsod sa Pinamungahan sa nilabay pang alas 11:00 sa gabii. Ang mga biktima mao si Irene Antopina, 39, kinsa mireklamo batok sa pag-umangkong si Arnel Antopina Alinghaw, 29, molupyo sa barangay Ibo sa siyudad saToledo. Ang mga nasakiyo nga butang mao ang laptop computer, knapsack nga gisudlan sa duha ka gold necklace, kwarta nga P2 mil, Digital Camera, hard disk, cellphone ug ang P1,000 sa iyang anak. Matud ni PO1 Froilan Velasquez sa Pinamungahan Police sa Banat News dunay nakakita sa suspek nga misud sa ilang balay samtang wala sila didto. Sa pag-imbestigar sa kapolisan, nasuta nga gipamrenda na diay niini ang maong mga butang ug nahurot na usab niya ang kwarta. (BANAT NEWS)