CEBU, Philippines - Mokabat sa dul-an tunga sa milyon ka pesos ang danyos sa nahitabong sunog sa sitio Mahayahay, Barangay Calamba niaging Huwebes sa hapon diin dili mominos 40 ka balay ang hingpit nga naugdaw. Si Cebu City Fire Marshall William Tacaldo Jr. nagkanayon nga miabot sa P450,000 ang danyos sa nahitabong sunog pasado alas-3 sa hapon niadtong Huwebes.
Si Tacaldo nagkanayon nga ila pa usab gisubay ang hinungdan sa sunog apan sigon sa una nilang nakuha nga impormasyon, ma-trace sa electrical misuse ug sa kandila ang maong sunog.
Dugang pa ni Tacaldo nga ubay-ubay ka residente ang mipasangil nga nagsugod ang sunog sa panimalay ni Gema Flores, ug duna say migawas nga report nga ang maong sunog nagsugod sa panimalay sa usa ka Teofilo Villamonte.
Dunay lima ka tawo, apil na ang imbestigador nga si SFO1 Omar Segovia ang gikatahong naangol samtang duha usab ka iro ang giingong namatay.Si Esther Concha sa Department of Social Welfare and Services sa Cebu City Hall ang nagkanayon nga 90 ka pamilya kon 350 kaindibidwal ang naapektuhan sa maong sunog.
Sud sa tulo ka adlaw, ang DSWS mohatag og libreng pagkaon para sa mga nasunogan ug uban pang hinabang sama sa disaster kits ug housing materials.Apan dili pa mahatag dayon ang housing materials tungod sa giplanong re-blocking sa lugar.
Ang kapitan sa maong barangay nga si Vincent Quijano nagkanayon nga mag-agad lang sila sa Cebu City government sa maong plano. Gideklarar na kagahapon under state of calamity ang sitio Mahayahay ug mohatag sad sila og tag P1,500 kada pamilya. (Niña G. Sumacot/EIM) (BANAT NEWS)